News
Լրահոս
News
Չորեքշաբթի
Մայիս 29
Տեսնել լրահոսը


Պաշտոնավարման 1 տարի, 11 ամիսների ընթացքում անդադար ես տեսնում էի, որ ինչ-որ մարդիկ փորձագետի, վերլուծաբանի անվանումների տակ քարոզչություն են իրականացնում տարբեր հեռուստաընկերությունների եթերներում, յութուբի ալիքներում եւ այդ քարոզչությունը բնավ Հայաստանի շահերի մասին չէր: Այս մասին իր տարածած տեսանյութում նշել է ՀՀ հատուկ հանձնարարություններով նախկին դեսպան, «Լուսավոր Հայաստանի» ղեկավար Էդմոն Մարուքյանը:

«Այս մարդիկ խոսում են բաներ, որոնց 80 տոկոսն իրականության հետ կապ չունի, մնացած 20 տոկոսը կիսաճշմարտությունների ինչ-որ խառնիճաղանճ բան է եւ պրոպագանդա: Ո՞ւմ շահերն են այս մարդիկ սպասարկում: Իմ ուսումնասիրությունները բերել են այն համոզման, որ այս մարդիկ ՀՀ-ում սպասարկում են Ադրբեջանի եւ Թուրքիայի շահերը:

Ես իմ ունեցած գիտելիքներով եւ տեղեկատվությամբ գիտեմ, թե ինչ են ուզում Ադրբեջանը եւ Թուրքիան եւ կարմիր թելի պես նրանք իրենց բոլոր եթերներում քարոզում ու լոբբինգ են անում այն, ինչ ուզում է Ադրբեջանը: Հայերեն ասած ջատագովում են: Սակայն ինչպե՞ս են լոբբինգ անում:

Եթե մարդն ասի՝ ժողովուրդ ջան, Թուրքիային օգուտ է այս հանգամանքը, դրա համար մենք պետք է դա անենք, դուք միանգամից նեգատիվ բան կունենաք, բայց այդ մարդիկ այդ տեքստերն ասում են այլ կերպ: Ասում են՝ դա պետք է Հայաստանին, Հայաստանը պետք է հզորանա դրանով, ԵՄ-ն օգնում է մեզ այդ հարցում, ԱՄՆ-ն է մեզ աջակցում, կամ ասում են՝ Ֆրանսիային է դա օգուտ: Որ երկրի ռեյտինգը բարձր է երկրի ներսում, այդ երկրին են վերագրում եւ ասում՝ Հայաստանի շահերից է բխում, որ այդ պարագայում այդ երկիրը մեզ կօգնի: Բայց ես ձեզ հավաստիացնում եմ, որ Ադրբեջանի եւ Թուրքիայի շահերն են սպասարկում, նրանց նարատիվներն են առաջ մղում: Ոչ ԵՄ-ն, ոչ ԱՄՆ-ն կապ չունեն դրա հետ»,- հայտարարեց Մարուքյանը:

Նա նկատեց, որ հարյուր հազարավոր մարդիկ սպառում են այդ մարդկանց եթերները. «Որոշ դեպքերում մարդը ալիք ունի յութուբում, մոնետիզացված է եւ փող է աշխատում մարդը ամեն մի ձեր դիտումից: Նրանք փորձում են վարկաբեկել Հայաստանում բոլոր ողջամիտ, հավասարակշիռ ուժերին եւ քննադատելով, վիրավորելով այդ մարդկանց, փորձում են դաշտը ապականել, պղտորել, իրենք դաշտում դառնան դոմինանտ եւ ազդեն հանրային կարծիքի վրա: Դրա վերջը շատ վատ է, արյունահեղություն է»,- ասաց Մարուքյանը:

Նա կոնկրետ անուններ էլ հնչեցրեց:

Մարուքյանը ցույց տվեց վերլուծաբան Արմեն Չիբուխչյանի լուսանկարը, որը յութուբում վերլւծություններ է ներկայացնում: Նրա խոսքով, Արմեն Չիբուխչյանի վերլուծությունները մի մասը սուտ է, մի մասը կիսաճշմարտություններ են, մի մասն էլ Ադրբեջանի ու Թուրքիայի պրոպագանդան է: Մարուքյանը հիշեցրեց, որ Արմեն Չիբուխչյանն աշխատել է ՀՅԴ-ի «Երկիր» եւ Սամվել Մայրապետյանի «Հ2» հեռուստընկերություններում, իսկ հետո նախկիններին թալանչի է անվանում:

«Սովորական ավանտյուրիստ է, ստախոս, խաբեբա, քարոզչության հետևանքով երկիրը կարող է  տանել արյունահեղության»,-ասաց Մարուքյանը եւ պատռեց Արմեն Չիբուխչյանի նկարը:

Նա անդրադարձավ եւս մեկ անձի՝ սոցիոլոգ Կարեն Սարգսյանին. «Եթե Հայաստանում սառնարանն էլ բացեք, ինքը խոսում է: Այս մեկը բնակվում է Հայաստանում։ Փորձում եմ նրա կենսագրությունը գտնել, չկա։

Ժողովուրդը նստած լսում է էս մարդուն, էլի վիրավորական պառապաշարով: Երկրի վարչապետի, փոխվարչապետի, իմ նկտմամբ է վիրավորական արտահայտություններ արել, ԱԳ նախարարի, տարբեր գործիչների: Ինչ ասես ասել է, եւ ասածների մեծամասնությունը սուտ է, կեղծիք, խաբեբայություն, սովորական ավանտյուրիստ։ Եվ դուք ժողովուրդ, հարյուր հազարներով նստած լսում եք։

Եթե այսօր ես չասեմ դա ձեզ, վաղը ես ինձ մեղադրելու են։ Նա ասում է, Թուրքիան Հայաստանի թշնամի չէ, Թուրքիան ցեղասպանություն չի իրականացրել, այ երբ արխիվները կբացվեն, դուք կտեսնեք, որ ռուսներն են դա արել: Թուրքիան հակառակորդ է, թշնամին Ռուսաստանն է, շատ հայերի շոկ է սպասում, երբ Թուրքիան բացի Մեծ եղեռնի արխիվները։

Այս մարդու կողմից ցեղասպանության սրբադասված զոհերը անարգվում են, դուք հանգիստ նստած նայում եք: Սրա նմաններին պետք է տանել Սիրիայի Դեր Զոր անապատ»,-ասաց Մարուքյանը եւ պատռեց նաեւ Կարեն Սարգսյանի նկարը:

«Վաղը մյուս օրը, որպեսզի արդարացնի, թե ինչու պետք է ՀՀ-ում տեղակայվեն թուրքական զորքեր, թե ինչու պետք է թուրքական զորքերը հսկեն որեւէ ճանապարհ, իսկ վաղը դա է ասելու, դրա համար նախապես պետք է Թուրքիային ազատել ցեղասպանության մեղքից: Դրանից հետո էլ կարողանալու է լոբբինգ անել, որ Հայաստանը պետք է անցնի Թուրքիայի մոդերացիայի տակ:

Թող իրավապահները զբաղվեն: Դուք չեք պատկերացնի, թե Հայաստանն ինչ գործակալական ցանցերի ազդեցության թիրախում է հայտնված:

Որքան հեռու այս ապականիչ քարոզչությունից, այնքան Աստծուն մոտ եւ այնքան Հայաստանի փրկություն»,- իր խոսքն ամփոփեց Մարուքյանը:

!
Այս նյութը հասանելի է նաև   Русский
Տպել
Ամենաշատ