Վրաստանի խորհրդարանի մոտ բողոքի ցույց է տեղի ունենում՝ ընդդեմ «օտարերկրյա գործակալների» մասին օրենքի ընդունման, որը երկուշաբթի օրը պետք է քննարկի խորհրդարանական հանձնաժողովը, հայտնում է Грузия Online-ը։
Հանրահավաքի մասնակիցները բողոքում են «Արտաքին ազդեցության թափանցիկության մասին» օրինագծի դեմ, որն այսօր առավոտյան կքննարկվի դատական հանձնաժողովի կողմից։
Ցույցը տեղի է ունենում խորհրդարանի հետևի մուտքի մոտ։ Այդտեղ հավաքվել են հասարակական կազմակերպությունների և ԶԼՄ-ների ներկայացուցիչներ, որոնք պարզել են «Ո՛չ ռուսաստանյան օրենքին» գրությամբ պաստառներ։ Նրանք առաջարկվող օրինագիծը համեմատում են ռուսաստանյան օրենսդրության հետ, որը Կրեմլն օգտագործում է այլախոհությունը ճնշելու համար: Դեպքի վայրում մոբիլիզացված է ոստիկանությունը։
Ինչպես հայտնում է SOVA-ն, ցուցարարները խորհրդարանի մոտ պարզել են ԵՄ դրոշը։
Բացի այս ցույցից, օրինագծի դեմ բողոքի հերթական ակցիան տեղի կունենա երեկոյան՝ ժամը 19:00-ին, խորհրդարանի դիմաց։
«Վրաստանի եվրոպական ապագայի համար պայքարը շարունակվում է։ Մի՛ մնա տանը, դուրս արի փողոց։ «Ռուսաստանյան օրենքը» վերաբերում է Վրաստանի բոլոր քաղաքացիներին։ «Ռուսաստանյան օրենքը» մեծ պատ է Վրաստանի և Եվրոպայի միջև. Այո՛ - Եվրոպային։ Ո՛չ ռուսաստանյան օրենքին»,- ասվում է բողոքի ակցիաների կազմակերպիչների սոցցանցերում տարածած տեղեկատվության մեջ։
Եվրահանձնաժողովը Վրաստանին կոչ է արել հետ կանչել «օտարերկրյա գործակալների մասին» օրինագիծը՝ մտահոգություն հայտնելով դրա հնարավոր ընդունման կապակցությամբ։
Վրաստանում Եվրամիության դեսպանն ասել է, որ «օտարերկրյա գործակալների» օրինագիծը անհամատեղելի է ԵՄ արժեքների հետ, որին երկիրը ձգտում է միանալ։