Իշխանություններն ուղիղ հայտարարում են, որ արցախցիների Արցախ վերադարձի հարցն իրենց օրակարգում չկա. սա այն քիչ հարցերից է, որի շուրջ աշխարհում իրար դեմ հակամարտող կողմերը կարծես թե նույն ձեւ են մտածում, մինչդեռ Հայաստանի իշխանությունն այդ ուղղությամբ ոչ մի քայլ չի ձեռնարկում։ Այս մասին Վայքի բնակիչների հետ հանդիպմանը նշել է «Հայաստան» խմբակցության պատգամավոր Լևոն Քոչարյանը։

«մենք նույն արձագանքը լսում ենք ամերիկացիներից, ռուսներից ու եվրոպացիներից. Նրանք բոլորն էլ ասում են, որ մարդիկ պետք է ունենա վերադառնալու իրավունքը, պետք է ունենան անվտանգության ամենաբարձր երաշխիքները, հակառակ դեպքում չեն գնա, բայց դրանից չի խոսում ՀՀ իշխանությունը: Այս ամենի հետեւից գնացողը պետք է լինի ՀՀ իշխանությունը: Եթե իրենք դա չեն անում, հասկանալի չէ, թե ոնց պետք է դա արվի»,-ասաց նա:

Լեւոն Քոչարյանի խոսքով սուտ են ասում իշխանությունները, երբ հայտարարում են, թե իզուր ենք 30 տարի պայքարել, մեկ է՝ վերջը այսպես էր լինելու. «Այն, ինչը ունեցել ենք, պահել ենք, դա եղել է նպատակաուղղված աշխատանքի արդյունքում»,-ասաց ընդդիմադիր պատգամավորը:

Նշենք, որ «Հայաստան» խմբակցության պատգամավորներն ապրիլի 13-ին այցելել են Վայոց Ձորի մարզ, հանդիպումներ ունեցել Վայքի և Եղեգնաձորի բնակիչների հետ, քննարկել երկրում ստեղծված իրավիճակը, պատասխանել նրանց հուզող հարցերին։