Պաղեստինի նախագահ Մահմուդ Աբասը մերժել է ԱՄՆ նախագահ Ջո Բայդենի վարչակազմի խնդրանքները՝ Պաղեստինին ՄԱԿ-ի լիիրավ անդամ ընդունելու հարցը ՄԱԿ-ի Անվտանգության խորհրդում (ԱԽ) չքվեարկելու վերաբերյալ։ Այս մասին հայտնում է Axios-ը՝ հղում անելով աղբյուրներին։
Պորտալի աղբյուրների հաղորդմամբ՝ ԱՄՆ նախագահի վարչակազմը վերջին երկու շաբաթվա ընթացքում ճնշում է գործադրել Պաղեստինի նախագահի և նրա խորհրդականների վրա՝ ՄԱԿ-ին անդամակցելու իրենց դիմումը հետ կանչելու համար։ Ամերիկացի պաշտոնյաները երկու շաբաթվա ընթացքում գրեթե ամեն օր քննարկել են այդ հարցը պաղեստինցի գործընկերների հետ, իսկ ԱՄՆ պետքարտուղար էնթոնի Բլինքենն ուղղակիորեն բարձրացրել է այդ հարցը Աբասի հետ հեռախոսազրույցում, գրում է պորտալը։
Բարձրաստիճան պաշտոնյան հայտնել է թերթին, որ Բայդենի վարչակազմը հարցրել է՝ արդյո՞ք Աբասը կկանգնեցնի հայտը, եթե նրան հրավիրեն Սպիտակ տանը Բայդենի հետ հանդիպմանը, սակայն Պաղեստինի նախագահը մերժել է:
Իսրայելցի պաշտոնյան պորտալին հայտնել է, որ ակնկալվում է, որ Պաղեստինի հայտին կաջակցեն Ալժիրը, Գայանան, Չինաստանը, Մալթան, Մոզամբիկը, Ռուսաստանը, Սլովենիան և Սիերա Լեոնեն: Ենթադրվում է, որ Մեծ Բրիտանիան ձեռնպահ կմնա քվեարկությունից։
ԱՄՆ-ն և Իսրայելը, ըստ աղբյուրի, համոզում են Ֆրանսիային, Շվեյցարիային, Էկվադորին, Հարավային Կորեային և Ճապոնիային դեմ քվեարկել Պաղեստինի հայտին կամ ձեռնպահ մնալ քվեարկությունից։ Միևնույն ժամանակ, ակնկալվում է, որ ԱՄՆ-ն վետո կդնի բանաձևի վրա, եթե ջանքերը հաջողությամբ չպսակվեն, հայտնում է պորտալը՝ հղում անելով աղբյուրներին։
