Միացյալ Նահանգները ԵՄ առաքելության միջոցով ՆԱՏՕ-ի ուժերին ներգրավում է Հարավային Կովկաս։ Այս մասին ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Կանադայի ներկայացուցչի միացումը դիտորդներին։
«Մենք նշում ենք ԵՄ ներկայության լիակատար անարդյունավետությունը տեղում միջադեպերը կանխելու առումով։ Ամեն օր մենք ավելի ու ավելի ենք համոզվում Բաքվի և Երևանի միջև հարաբերությունների կարգավորման գործում ԵՄ-ի կողմից որևէ դրական ներդրման բացակայության մեջ»,- ասել է Զախարովան։
Ընդհակառակը, Եվրամիության ներկայացուցիչները, ըստ նրա, զբաղված են տարբեր տեսակի սադրանքներով, հետախուզական գործունեությամբ, քարոզչությամբ։ Ըստ Զախարովայի գնահատականի, դա օրինաչափ մերժում է առաջացնում տարածաշրջանի երկրների մոտ, որոնք միասնական են նրանում, որ Անդրկովկասում ծագող ցանկացած խնդիր պետք է լուծվի Հարավային Կովկասում՝ ի շահ այստեղ գտնվող բոլոր երկրների՝ առանց դրսի ապակաուցողական միջամտության։
«Ինչպես հասկանում ենք, Օտտավայի՝ ԵՄ առաքելությանը միանալու հարցն արդեն անցել է գործնական հարթություն։ Օրերս Կանադայից Հայաստան է ժամանել, այսպես կոչված, փորձագետ։ Պարզ չէ, թե որն է նման լուծման հավելյալ արժեքը, որքանով է այն պահանջված հայերի կողմից։ Թող իրենք մեկնաբանեն»,- ասել է Զախարովան։
Ըստ Զախարովայի, ամենայն հավանականությամբ, բանն այն է, որ այս իրավիճակում ԱՄՆ-ի կրտսեր գործընկերը՝ Եվրամիությունը, օգտագործվում է Վաշինգտոնի կողմից՝ ՆԱՏՕ-ի ուժերը տարածաշրջան ներքաշելու համար։
«Ակնհայտ է, որ Ատլանտյան օվկիանոսի մյուս կողմում նրանք ցանկանում են ոչ միայն ընդլայնել տեղում իրավիճակը վերահսկելու հնարավորությունը, այլև հետևել իրենց եվրոպացի դաշնակիցներին», - ասել է ՌԴ ԱԳՆ ներկայացուցիչը։