Վրաստանի իշխող «Վրացական երազանք» կուսակցությունը հայտարարել է խորհրդարանի մոտ հանրահավաք անցկացնելու մասին՝ ի պաշտպանություն «Արտաքին ազդեցության թափանցիկության մասին» իր օրինագծի, որը սուր քննադատության է ենթարկվում Արևմուտքում և որը հարուցել է քաղաքացիական հասարակության վրդովմունքը, հայտնում է «Նովոստի Գրուզիան»։

Կուսակցությունը հայտարարություն է տարածել՝ կոչ անելով իր համակիրներին ապրիլի 29-ին՝ «Օտարերկրյա գործակալների մասին» վիճահարույց օրենքի նախագծի երկրորդ ընթերցմամբ քննարկման նախորդ օրը գալ խորհրդարանի մոտ և հանդես գալ «ընդդեմ հեղափոխության»։

«Կոչ ենք անում ձեզ՝ երկրի հայրենասեր քաղաքացիներ, մերժել Վրաստանում սև փողերով արվող հեղափոխությունը, մերժել ուղղափառ եկեղեցու վրա հարձակումները, ԼԳԲՏ-ի, թմրանյութերի քարոզչությունը, պետական ​​կառույցների վարկաբեկումը, արմատականությունը և բևեռացման ֆինանսավորումը... Մենք չենք կարող թույլ տալ քաղաքականապես և բարոյապես սնանկացած քաղաքական փոքրամասնությանը շահարկել և խոսել ժողովրդի անունից։ Մենք բոլորին ցույց կտանք, թե որտեղ է կանգնած վրաց ժողովրդի ճնշող մեծամասնությունը, որոնք գնահատում են ճշմարտությունն ու իսկական եվրոպական արժեքները, գնահատում են մեր ավանդական ազգային արժեքները»,- ասված է ակցիայի հրավերում։