ԱՄՆ պետքարտուղար Էնթոնի Բլինքենը վերջերս Կիեւ կատարած այցից հետո ցանկանում է Ջո Բայդենին առաջարկել թույլ տալ Կիեւին ԱՄՆ զենքով հարվածել ՌԴ տարածքին։ Այս մասին տեղեկացրել է The New York Times թերթը՝ հղում կատարելով ամերիկյան պաշտոնյաներին։
Նրանց տվյալներով՝ այժմ ԱՄՆ վարչակազմի ներսում ակտիվ բանակռիվներ են ընթանում այդ արգելքը հանելու շուրջ, քանի որ ՌԴ ԶՈւ-ն հարձակումներ է իրականացնում Խարկովի մոտ։ Ինչպես նշել է թերթը, ռուս զինվորականներն ընտրել են այս ռազմավարությունը, քանի որ Ուկրաինայի ԶՈւ-ին թույլ չի տրվում ամերիկյան զենքն օգտագործել Ռուսաստանի տարածքին հարվածներ հասցնելու համար։ Այժմ Բլինքենը մտադիր է առաջարկել ԱՄՆ նախագահ Ջո Բայդենին հանել այդ սահմանափակումը, գրել է NYT-ը։
Թերթի տեղեկացմամբ՝ խոսքը միայն ռազմական օբյեկտներին հարվածելու արգելքը հանելու մասին է, այն դեպքում, երբ արգելքը ռուսական նավթավերամշակման գործարանների եւ այլ ենթակառուցվածքի նկատմամբ պահպանվում է։ Նշվել է, որ առաջարկը դեռ վերջնականապես մշակված չէ, եւ առայժմ պարզ չէ, թե քանի պաշտոնյա է Բայդենի մերձավոր շրջապատում աջակցում դրան։ NYT-ը պնդել է, որ ԱՄՆ նախագահն ինքը սովորաբար զգուշություն է ցուցաբերում նման հարցերի լուծման ժամանակ։