Յուրայ Ցինտուլան, ով մեղադրվում է Սլովակիայի վարչապետ Ռոբերտ Ֆիցոյի դեմ մահափորձի մեջ, դատարանում ասել է, որ հանցագործությունը կատարել է Ուկրաինայի նկատմամբ երկրի ղեկավարության դիրքորոշումից դժգոհ լինելու պատճառով։ Այս մասին հայտնում է Bloomberg-ը՝ հղում անելով իր մոտ հասած գործի նյութերին։
Դատարանի փաստաթղթից ստացված տեղեկատվության համաձայն՝ 71-ամյա Ցինտուլան իրավապահներին ասել է, որ իր գործողությունների դրդապատճառը կառավարության քաղաքականությունից դժգոհությունն է, առաջին հերթին՝ Ուկրաինային ռազմական աջակցությունը դադարեցնելու Ֆիցոյի որոշումից։ Երկրի իշխանությունների այս դիրքորոշումը կասկածյալին թվացել է «դավաճանություն ԵՄ-ին»։ Ցինտուլան նաև ասել է, որ ինքը գործել է միայնակ և մտադրություն չի ունեցել խլել քաղաքական գործչի կյանքը, հայտնում է Bloomberg-ը։
Մայիսի 23-ին «Պրավդա» լրատվական պորտալը, վկայակոչելով դատական նյութերը, հայտնել է, որ Ցինտուլան հանցագործությունը ծրագրել է դրա կատարումից երկու օր առաջ՝ փորձից առաջ պատրաստելով ատրճանակի երկու պահունակ։ Ըստ պորտալի՝ նա ոչ թե սպանելու, այլ Ֆիցոյի «առողջությանը վնաս պատճառելու» նպատակ է ունեցել, որպեսզի նա չկարողանա զբաղեցնել վարչապետի պաշտոնը։
Ֆիցոյի դեմ մահափորձը տեղի է ունեցել մայիսի 15-ին Սլովակիայի արեւմուտքում գտնվող Հանդլով քաղաքում։
