Իրանի խորհրդարանի ազգային անվտանգության եւ արտաքին քաղաքականության հանձնաժողովի փոխնախագահ Հուսեյն Իբրահիմին հայտնել է, թե Իրանում պլաններ կան, թե ինչպես չեզոքացնել Թուրքիայում տեղակայվելիք ՆԱՏՕ-ի հակահրթիռային համակարգը եւ ցանկացած հարձակման դեպքում Իրանը հաստատ հարվածելու է դրանց:
Ինչպես տեղեկացնում է թուրքական Milliyet-ը, իրանցի պատգամավորը «Շարք» թերթին տված հարցազրույցում ասել է, թե Թուրքիայում գտնվող թիրախներին հարվածելը Իրանի բնական իրավունքն է եւ այն հաստատ կիրագործվի:
Հուսեյն Իբրահիմին հիշեցրել է Իրանի օդուժերի հրամանատար, գեներալ Էմիր Ալի Հաջիզադեյի խոսքերը, ով բաց տեքստով սպառնացել էր Թուրքիային` շեշտելով, թե Իրանի դեմ ցանկացած հարձակման դեպքում Իրանն առաջինը հարվածելու է Թուրքիային: «Գեներալ Հաջիզադեյի խոսքերը լրիվ տեղի են: Մեր դեմ հարձակման դեպքում, պաշտպանվելը բնական իրավունք է»,-ասել է Հուսեյն Իբրահիմին: