Ռուսաստանի էստրադային երգչուհի Իրինա Ալեգրովան հունվարի 20-ին տոնում է 60-ամյակը: Իր հոբելյանը երգչուհին նշում է բոլորից հեռու` Մայամիում, հարազատների եւ ընկերների հետ:
«Ես շատ ծրագրեր ունեմ, որոնք պետք է հասցնեմ իրականացնել: Առաջիկայում իմ հրաժեշտի շրջագայությունն է լինելու, որի նախապատրաստական աշխատանքները լայն թափով իրականացվում են»,-ասել է երգչուհին: Տոնական համերգը տեղի կունենա «Օլիմպիական» համալիրում մարտի 7-ին եւ կոչվելու է «Հրաժեշտի շրջագայություն: Շոու` ընկերների եւ հյուրերի մասնակցությամբ»: Երգչուհին խոստանում է կատարել գրեթե բոլոր հիթերը, ինչպես նաեւ բացարձակապես նոր երգեր, կլինեն նաեւ անակնկալներ: Ռուսաստանի մայրաքաղաքից հետո նա պատրաստվում է հանդես գալ նաեւ ԱՊՀ երկրներում, Եվրոպայում եւ Ամերիկայում: Բեմը լքելու իր որոշման մասին Ալեգրովան հայտարարել էր անցած տարեվերջին, գրում է km.ru-ն:
Նշենք, որ Իրինա Ալեգրովան ծնվել է 1952թ-ին Դոնի Ռոստովում: Նրա հայրը թատրոնի ռեժիսոր, դերասան, ՌԽՍՖՀ եւ Ադրբեջանական ԽՍՀ վաստակավոր արտիստ, հայազգի Ալեքսանդր Ալեգրովն էր: Իրինա Ալեգրովայի ստեղծագործական վերելքն սկսվեց 1990-ականներին: 2010 թ-ին նա արժանացավ Ռուսաստանի ժողովրդական արտիստի կոչման:
