Բաթումիի հասարակությունը դեմ է քաղաքում նոր մզկիթի կառուցմանը: Այս մասին հայտարարել է «Ծառայիր Վրաստանին» շարժման առաջնորդ Մուրման Դումբաձեն:
«Մենք դեմ չենք Աջարիայում կամ էլ Վրաստանի որեւէ այլ շրջանում ցանկացած վերականգնողական աշխատանքներին, սակայն կտրականապես դեմ ենք նոր մզկիթի կառուցմանը: Մենք` Բաթումիի բնակիչներս, բոլորին խոստանում ենք. Կկառուցվի նոր մզկիթ` կքանդվի բուլդոզերներով», - Դումբաձեի խոսքերն է մեջբերում «Գռուզիա online»-ը` հղում անելով «Վերսիա» թերթին:
Ավելի վաղ Վրաստանի մշակույթի եւ հուշարձանների պահպանման նախարար Նիկա Ռուրուան հայտնել է, որ Թուրքիա կատարած իր այցի ընթացքում պայմանավորվածություն է ձեռք բերվել մշակութային հուշարձանների վերաբերյալ:
Ռուրուան հայտարարել է, որ Օշկիի եւ Իշխանի վանքերի վերականգնման աշխատանքներին կմասնակցեն վրացի մասնագետներ: Ըստ նախարարի` թուրքական մշակութային ժառանգությունը, որը գտնվում է Վրաստանի տարածքում, նույնպես կվերականգնվի:
Թուրքիայի մշակույթի նախարարն իր հերթին հայտարարել է, որ վրացական եկեղեցիների վերականգնողական աշխատանքների փոխարեն վրացական կողմը տարածք կտրամադրի Ազիզեյ մզկիթի կառուցման համար: Բացի դրանից, վրացի շինարարները թուրք մասնագետների օգնությամբ կվերականգնեն Ախալցխայում Ահմեդի համալիրը: