«Մարս» գործարանը քարամշակման թվային հաստոցների տեխնոլոգիա է մշակել: Ինչպես NEWS.am-ին ասաց ընկերություն գործադիր տնօրեն Արման Սարգսյանը, հաստոցներն արդեն սերիական արտադրությունում են, 2012թ-ին նախատեսվում է արտադրել 20 -30 հատ: Մեկ հաստոցի արժեքը կազմում է մոտավորապես 100 հազ. դոլար:
«Մեն կարող ենք նաեւ այդ տիպի հաստոցների համար շարժիչներ պատրաստել, որոնց համար եւս առանձին տեխնոլոգիա է մշակված: Վերջերս մենք հաստոցը ներկայացրեցինք Գրեմանիայի արդյունաբերական ցուցահանդեսում: Նման տեխնոլոգիաներ աշխարհում արդեն կան, սակայն մենք կփորձենք մրցունակ լինել շուկայում»,-ասաց Սարգսյանը:
Հաջորդ քայլը լինելու է քարի եւ մետաղի մշակման համար բարձր ճշգրտությամբ լազերային հաստոցների յուրացումը: «Մենք մշակել ենք այդ հաստոցներում մանրաթելային լազերի ինտեգրման տեխնոլոգիա, որը կմեծացնի հաստոցների աշխատանքի արագությունն ու ճշգրտությունը»,-նշեց Սարգսյանը: Նման հաստոցի արժեքը կարող է հասնել մոտ մեկ միլիոն դոլարի:
Նշենք, որ «Մարս» գործարանի կառավարիչը Ռուսաստանյան «Սիտրոնիքս» տեխնոլոգիական կոնցեռնն է: