Եվրոպան արմատապես պետք է վերանայի իր մոտեցումները Հայոց ցեղասպանության ճանաչման եւ նրա ժխտման քրեականացման հարցում: Այս մասին Երեւանում փետրվարի 14-ի մամլո ասուլիսում նշել է Սլովակիայի Ազգային ժողովի առաջին նախագահ Ֆրանտիշեկ Միկլոշկոն:
Ըստ Միկլոշկոյի` Եվրոպան 20-րդ դարում մի քանի ցեղասպանությունների ականատես է դարձել, եւ դրանցից առաջինը Հայոց ցեղասպանությունն էր: «Դժբախտաբար, Եվրոպան մինչեւ այժմ չի հասկացել, որ հետագա հանցագործությունների հիմքը դարձել է Հայոց ցեղասպանությունը», - նշել է Միկլոշկոն: Ըստ նրա` Սլովակիան գիտակցել է հարցի նշանակությունը եւ օրրենսդրության մեջ համապատասխան հոդված է մտցրել: Մասնավորապես, նախատեսված է երկրի տարածքում, իսկ Սլովակիայի քաղաքացիների համար` նաեւ դրա սահմաններից դուրս Հայոց ցեղասպանության ժխտման համար ենթարկել 3-ից մինչեւ 5 տարի ազատազրկման:
Այժմ նմանատիպ օրենքի ընդունման գործընթաց է սկսվել Ֆրանսիայում, հիշեցրել է Միլոշկոն` ավելացնելով, որ ամենայն հավանականությամբ Ֆրանսիայի Սահմանադրական դատարանը փետրվարի 21-ին որոշում կկայացնի:
Հունվարի 23-ին Ֆրանսիայի Սենատը ցեղասպանությունների, այդ թվում նաեւ` Հայոց ցեղասպանության ժխտումը քրեականացնող օրինագիծ էր ընդունել: Սակայն հետո մի խումբ սենատորներ որոշումը բողոքարկել են Սահմանադրական դատարանում:
