Իրանական կողմը պատրաստ է Իրան-Հայաստան երկաթուղու շինարարությանը եւ սպասում է անհրաժեշտ ֆինանսական միջոցների:
Այդ մասին, այսօր` փետրվարի 24-ին, հայտարարել է Հայաստանում Իրանի դեսպան Սեյեդ Ալի Սաղաիյանը` ելույթ ունենալով Երեւանի պետական համալսարանում: Նա հիշեցրել է, որ վերջերս այդ հարցի առթիվ տեղի է ունեցել աշխատանքային խմբի հերթական նիստը` Ռուսաստանի, Իրանի եւ Հայաստանի տրանսպորտի նախարարության ղեկավարների մասնակցությամբ:
«Վերջերս Երեւանում է գտնվել Ռուսական երկաթուղիների ղեկավարը, որն իր կողմից դրական վերաբերմունք է հայտնել այդ նախագծի վերաբերյալ: Նախագիծը մեծ արժողություն ունի, մոտ մի քանի միլիարդ դոլարների հասնող: Սակայն մենք վճռական ենք տրամադրված»,-ասել է դեսպանը:
Հիշեցնենք, որ նախագծի իրականացումը ավելի վաղ գնահատվում էր 1,5-2 միլիարդ դոլար, նվազագույն ժամանակահատվածը` 5 տարի: 2010-ի մայիսին Հայաստանը շինարարության համար հայց է ներկայացրել ԵվրԱզԷս-ի հակաճգնաժամային ֆոնդին: Այն ժամանակի քննարկվում էր նաեւ նախագծին չինական կողմից մասնակցության հարցը:
