Մարտի 19-ին Վրաստանի ափային փրկարար պահպանության ծառայությունը Թուրքիայի սահմանի մոտ` Աջարիայում, նավարկության կանոնները խախտելու համար ձերբակալել է ռուսական դրոշով «Pur-navolok» բեռնանավը: Այդ մասին ասվում է Վրաստանի սահմանապահ ոստիկանության մամլո ծառայության հայտարարության մեջ:
Նավի անձնակազմում կա 10 մարդ, բոլոր նրանք Ռուսաստանի քաղաքացիներ են:
Վրաստանում ձերբակալված ՌԴ-ի նավը կարող են տուգանել մինչեւ 30 հազար դոլարով: Փաստաբանները նախազգուշացրել են անձնակազմին, որ խախտվել է ներքին ծովային ջրերում նավարկելու վրացական օրենքը, «Ռուսկայա սլուժբա նովստեյ»-ին է պատմել «Pur-navolok» ձերբակալված նավի օպերատոր Եվգենի Միրովսկին: «Մենք երկու տարբերակ ունենք. Կամ մենք կամավոր վճարում ենք այդ գումարը, կամ էլ սպասում ենք դատարանի որոշմանը, որը կվերանայվի 10 օրվա ընթացքում: Սակայն միանշանակ տուգանք կլինի»,- ասել է նա:
«Ներքին ծովային ջրերում նավարկելու վրացական օրենքի խախտում» ձեւակերպման թիկունքում իրականում կարող է ընկած լինել «Գրավյալ տարածքների մասին» վրացական օրենքի խախտումը: Այսինքն, նավը կարող էր մինչ այդ առանց Թբիլիսիի համաձայնության գտնվել Աբխազիայում, իսկ վրացական օրենքների համաձայն դա անել չի կարելի, հայտնում է «Վզգլյադը»: