ԵԱՀԿ Մինսկի խմբի համանախագահող երկրների ԱԳ նախարարները ԼՂ խնդրում միջնորդական գործունեության 20-ամյակի կապակցությամբ համատեղ հայատարարություն են ընդունել:
Նրանք կոչ են անում հակամարտության կողմերին ցուցաբերել քաղաքական կամք, որն անհրաժեշտ է կայուն եւ խաղաղ կարգավորման հասնելու համար: Այս մասին ասվում է Ռուսաստանի, ԱՄՆ-ի եւ Ֆրանսիայի ԱԳ նախարարներ Սերգեյ Լավրովի, Հիլարի Քլինթոնի եւ Ալեն Ժյուպեի համատեղ հայտարարության մեջ:
«Մենք կոչ ենք անում կողմերի առաջնորդներին, որքան հնարավոր է արագ ավարտել աշխատանքը շրջանակային համաձայնության եւ հետագա վերջնական համաձայնագրի շուրջ` Հելսինկյան ամփոփիչ ակտի, ուժի կամ ուժի սպառնալիքի չկիրառման, տարածքային ամբողջականության եւ ժողովուրդների ինքնորոշման եւ իրավահավասարության սկզբունքների, ՄԱԿ-ի կանոնադրության դրույթների, ինչպես նաեւ միջազգային իրավունքի նորմերի ու սկզբունքների հիման վրա, ինչը թույլ է տալիս ողջ տարածաշրջանին դուրս գալ ստատուս քվոյի շրջանակներից դեպի ավելի անվտանգ ու բարգավաճող ապագա»,-ասված է հայտարարությունում:
Հայտարարությունում նաեւ նշվում է, որ տարածաշրջանի ժողովուրդները առավել շատ են տուժել պատերազմի հետեւանքներից եւ ցանկացած դանդաղում խնդրի խաղաղ կարգավորման հարցում, կերկարաձգի նրանց դժվարությունները:
ԱԳ նախարարները կողմերի առաջնորդներին կոչ են արել իրենց ժողովուրդներին պատրաստել խաղաղության, այլ ոչ` պատերազմի, հաղորդում է Trend-ը: