Մոսկվայում շինարարական շուկայում հրդեհի հետեւանքով բոլոր զոհվածները Տաջիկստանի քաղաքացիներ են եղել: Այդ մասին հայտնել են Մոսկվայի իրավապահ մարմիններում:
Հիշեցնենք, որ հրդեհը բռնկվել է ապրիլի 3-ի առավոտյան` Վարշավայի մայրուղու Կաչալովյան շուկայում` պահեստին կից երկհարկանի շենքում: Հրդեհի հետեւանքով զոհվել են 12 միգրանտ աշխատողներ:
Նախնական զննումը ցույց է տվել, որ մի շարք մարմինների ինքնության ճանաչման համար անհրաժեշտ կլինի դատաբժշկական փորձաքննություն, քանի որ դրանք խիստ վնասվել են կրակից:
Ըստ նախնական տվյալների` հրդեհի պատճառ կարող էր դառնալ էլեկտրատաքացման անսարքությունը, կամ էլ կարճ միացումը:
«Ինտերֆաքսը», վկայակոչելով Մոսկվայի իրավապահ մարմինների աղբյուրը, հայտնում է, որ Կաչալովյան շուկայի տարածքում այրված աշխատողները տարհանման նորմալ ուղիներ չեն ունեցել, հրդեհի մարման համար հրշեջներն ստիպված են եղել քանդել պատը: Նրանք ապրել են մետաղյա կիսակառույցում` առանձին ջեռուցմամբ: Ներսում նրանք քնել են ահավոր նեղ պայմաններում` երկշարք տեղադրված երկհարկանի մահճակալներում: Կիսակառույցից դեպի փողոց ուղիղ ելք չի եղել:
Աղբյուրը հայտնել է, որ ըստ մարմինների դիրքի, մի մասը փորձել է փրկվել, սակայն նրանք խեղդվել են այրման արտանետումներից: