ՆախընտրելիՆիկոլ Փաշինյանի և նրա թիմի հռետորաբանությունը բացառապես հիմնված է անձնական սպառնալիքների, վիրավորանքների, քաղաքական ընդդիմախոսներին ու նրանց ընտանիքի անդամներին թիրախավորելու վրա, սակայն մենք ոչ մի դեպքում չենք իջնի այդ մակարդակին և չենք շեղվի մեր կառուցողական ուղուց։ Այս մասին մայիսի 25-ին լրագրողների հետ հանդիպման ժամանակ հայտարարել է «Բարգավաճ Հայաստան» կուսակցության առաջնորդի մամուլի քարտուղար Իվետա Տոնոյանը։
Նա ամփոփել է նախընտրական քարոզարշավի անցած շաբաթը՝ արձանագրելով, որ իշխող «Քաղաքացիական պայմանագիր» կուսակցությունը, բովանդակային ու ծրագրային երկխոսության բացակայության պատճառով, նախընտրական պայքարը տեղափոխել է ոչ կոռեկտ բառապաշարի և ֆիզիկական հաշվեհարդարի սպառնալիքների դաշտ։ Տոնոյանն առանձնահատուկ անդրադարձել է Հայաստանի Հանրային հեռուստաընկերության եթերով հեռարձակված տեսանյութին, որտեղ վիրավորական տոնով թիրախավորվել էին «Բարգավաճ Հայաստան» կուսակցության նախագահ Գագիկ Ծառուկյանն ու նրա ընտանիքի անդամները։
Մամուլի քարտուղարն ընդգծել է, որ հարկատուների միջոցներից ֆինանսավորվող լրատվամիջոցի կողմից նման հակաիրավական քայլը բացարձակապես անընդունելի է, և իրենց փաստաբանների խումբն արդեն զրպարտության փաստով դատական հայց է նախապատրաստում՝ հարցը իրավական դաշտում լուծելու համար։ Իվետա Տոնոյանը նշել է, որ կուսակցության հավասարակշռված պահվածքն ակնհայտորեն հունից հանում է իշխանություններին, որոնք վախի, ատելության ու անհանդուրժողականության մթնոլորտի գեներացման միջոցով փորձում են կաթվածահար անել ընդդիմության նախընտրական գործունեությունը։
Որպես ապացույց՝ ընդդիմադիր գործիչը մատնանշել է թիմակիցների նկատմամբ բռնաճնշումներն ու մտացածին քրեական գործերի հարուցումը, մասնավորապես՝ Անդրանիկ Թևանյանի անհիմն կալանավորումն ու Մարտուն Գրիգորյանի շուրջ ընթացող գործընթացները, որոնց վերաբերյալ որոշումները նույնպես կբողոքարկվեն դատարանում։ Միևնույն ժամանակ, «ԲՀԿ» առաջնորդի մամուլի քարտուղարը ուշադրություն է հրավիրել Հակակորուպցիոն կոմիտեի անգործության վրա՝ կոչ անելով գործ հարուցել հենց իշխանությունների դեմ, քանի որ նախընտրական շրջանում կենսաթոշակների բարձրացումը, պետական կառույցներում աստղաբաշխական պարգևավճարները և ազդեցիկ մարդկանց համար հնարովի հաստիքների ստեղծումը ընտրողների օրինականացված կաշառման ուղղակի դրսևորումներ են։ Քաղաքական գործիչն ամփոփել է, որ կյանքը հունիսի 7-ով չի ավարտվում, և քաղաքացիներն իրենց քվեարկությամբ վերջ կդնեն այս ամենաթողությանը՝ հանուն բարգավաճ ու խաղաղ Հայաստանի։
