նախընտրելի դարձնելՀայաստանի Նախագահ Վահագն Խաչատուրյանը օգոստոսի 2-ին շնորհավորեց պատգամավորներին 9-րդ գումարման Ազգային ժողովի աշխատանքների սկսվելու կապակցությամբ՝ հանդես գալով ողջույնի խոսքով։
Նա, մասնավորապես, ընդգծեց, որ խորհրդարանի գործունեության արդյունքները պետք է գնահատվեն ոչ միայն ընդունված օրենքների քանակով, այլև դրանց որակով, հասարակական ազդեցությամբ և պետության երկարաժամկետ զարգացման մեջ ունեցած ավանդով։
«Այսօր իր աշխատանքն է սկսում Հայաստանի նոր խորհրդարանը, որը ձևավորվել է ժողովրդի ազատ կամարտահայտման արդյունքում։ Սա մեր պետության կյանքում հերթական կարևոր փուլն է, որը նորից հաստատում է ժողովրդավարության հիմնարար սկզբունքը․ իշխանությունը բխում է ժողովրդից և իրականացվում է նրա ընտրած ներկայացուցիչների միջոցով», — ասաց Հայաստանի նախագահը՝ ելույթ ունենալով ԱԺ ամբիոնից։ Նա շնորհակալություն հայտնեց 8-րդ գումարման պատգամավորներին կատարած աշխատանքի և Հայաստանի Հանրապետության օրենսդրության զարգացման գործում ունեցած ավանդի համար։
«Հատուկ շնորհակալություն եմ ուզում հայտնել Հայաստանի Հանրապետության քաղաքացիներին։ Նրանց ակտիվ մասնակցությունը ընտրություններին և ազատ կամարտահայտումը ոչ միայն ժողովրդավարական գործընթացի կարևորագույն բաղադրիչն են, այլև մեր պետականության կենսունակության, հասարակական պատասխանատվության և քաղաքացիական հասունության լավագույն ապացույցը», — ընդգծեց Խաչատուրյանը՝ շնորհավորելով նաև Ազգային ժողով անցած քաղաքական ուժերին։
Ըստ նախագահի, Ազգային ժողովի յուրաքանչյուր գումարում ձևավորում է ոչ միայն իր ժամանակի քաղաքական օրակարգը, այլև պետության ինստիտուցիոնալ զարգացման մշակույթը։ «Այս խորհրդարանի գործունեության արդյունքները չափվելու են ոչ միայն ընդունված օրենքների քանակով, այլև դրանց որակով, հասարակական ազդեցությամբ և պետության երկարաժամկետ զարգացման մեջ ունեցած ավանդով։ Հայաստանի Հանրապետության քաղաքացիներն այս դահլիճից ակնկալում են հասուն քաղաքականություն, պատասխանատու օրինաստեղծ աշխատանք և այնպիսի քննարկումներ, որոնց կենտրոնում կլինի ոչ թե քաղաքական հակադրությունը, այլ պետական մտածողությունը», — հայտարարեց նա։
Վահագն Խաչատուրյանը հիշեցրեց, որ Ազգային ժողովը երկրի բարձրագույն ներկայացուցչական և օրենսդիր մարմինն է, ինչպես նաև պետության գլխավոր քաղաքական ամբիոնը։ «Հենց այստեղ գաղափարների մրցակցությունը պետք է վերածվի պետական որոշումների, քաղաքական տարաձայնությունները՝ ավելի որակյալ լուծումների, իսկ հասարակական վստահությունը՝ արդար և կենսունակ օրենքների։ Ժողովրդավարության ուժը չի որոշվում կարծիքների միասնությամբ։ Այն կայանում է հանուն մեկ նպատակի՝ Հայաստանի Հանրապետության ամրապնդման և հասարակական բարօրության, տարբեր հայացքների խաղաղ, արժանապատիվ և պատասխանատու համագոյակցության մեջ», — ընդգծեց նախագահը։
Ըստ նրա, խորհրդարանական բանավեճերը ժողովրդավարության անբաժանելի մասն են, սակայն դրանց արժեքը որոշվում է ոչ թե հնչող խոսքերի սրությամբ, այլ գաղափարներով, որոնք ծառայում են հասարակական բարօրությանը։
«Քաղաքական մրցակցությունն ինքնանպատակ չէ։ Այն արժեքավոր է այնքանով, որքանով նպաստում է առավել արդյունավետ կառավարմանը, առավել արդար օրենսդրությանը և պետության ամրապնդմանը», — եզրափակեց նախագահը, որը, Սահմանադրության համաձայն, արարողակարգային դեմք է։
