ՆախընտրելիՀայաստանի կառավարությունը հնազանդորեն առաջ է մղում ադրբեջանական օրակարգը՝ հանձնելով տարածքներ և չներկայացնելով որևէ փոխադարձ իրավական կամ քաղաքական պահանջ։ Այս մասին օգոստոսի 21-ին Ազգային ժողովում լրագրողների հետ զրույցում հայտնել է ընդդիմադիր «Հայաստան» խմբակցության պատգամավոր Քրիստինե Վարդանյանը։
Մեկնաբանելով վարչապետ Նիկոլ Փաշինյանի վերջին հայտարարությունները, թե Քյարքի (Տիգրանաշեն) գյուղը, իբր, Հայաստանի տարածք չէ, պատգամավորն ընդգծել է նման պնդումների համար որևէ իրավական հիմքի բացակայությունը։ «Եթե գոյություն ունենար թեկուզ որևէ իրավական հիմնավորում, մենք այն առաջինը կտեսնեինք իշխանամետ լրատվամիջոցների էջերում և Փաշինյանի սոցիալական ցանցերում։ «Քաղաքացիական պայմանագիր» խմբակցության պատգամավորներն անընդհատ հղում կկատարեին դրան։ Բայց իրավական բազա չկա։ Փոխարենը կա Ադրբեջանի պահանջների ավելի ու ավելի սեղմվող օղակ՝ տարածքային հավակնություններից մինչև Հայաստանի Սահմանադրության փոփոխություն», - հայտնել է Վարդանյանը։
Պատգամավորի կարծիքով՝ բանակցային գործընթացում հայկական օրակարգը լիովին բացակայում է։ Հայկական տարածքների դեօկուպացիայի, գերիների վերադարձի և արցախցիների իրավունքների հարցերի քննարկման փոխարեն իշխանությունները զբաղված են Բաքվի պահանջների հիմնավորմամբ։
«Սահմանազատման և սահմանագծման գործընթացը վերածվել է միակողմանի զիջումների գործընթացի։ Չկա հյուսիսից հարավ ամբողջ ընթացքը ներառող որևէ միասնական հրապարակված քարտեզ կամ ամրագրված սահման, որով ընթանում է գործընթացը։ Ամեն ինչ տեղի է ունենում հատվածաբար՝ այնպես, ինչպես ձեռնտու է Ադրբեջանին։ Եթե իշխանության լիներ ընդդիմությունը, այսօր բոլոր քննարկումների գլխավոր թեման կլիներ Ադրբեջանի կողմից օկուպացված Հայաստանի տարածքների հարցը, որն ամրագրված է տասնյակ միջազգային բանաձևերում, ոչ թե նոր բնակավայրերի հանձնումը», - ընդգծել է Քրիստինե Վարդանյանը։
Նա նաև հավելել է, որ ընդդիմությունը պետք է համախմբի հասարակությանը և ձևավորի միասնական ճամբար՝ ընդդեմ Բաքվի և Անկարայի պահանջներին հաճոյանալու համար Երրորդ Հանրապետության ապամոնտաժման իշխանական ծրագրի։
