Հարավային Կորեայում ազատ են արձակել գորշ շնաձկան էգին, որն ավելի քան մեկ ամիս անցկացրել էր թակարդում՝ նավահանգստային Պուսան քաղաքի ջրանցքում, հայտնում է Associated Press-ը։

Մոտ երեք մետր երկարությամբ շնաձուկը դարձել էր տեղական տեսարժանություն. քաղաքային իշխանությունների տվյալներով՝ նրան տեսնելու էր եկել ավելի քան 1,7 միլիոն մարդ։

Բուկանգի մականունով շնաձկանը, որին անվանել էին Պուսանի Հյուսիսային նավահանգստի պատվին, առաջին անգամ նկատել էին սեպտեմբերի կեսերին։ Այն լողում էր նեղ ջրանցքով, և նրա մեջքային լողակը պարբերաբար երևում էր ջրի մակերևույթից վեր։ Սեպտեմբերի 29-ին և հոկտեմբերի 2-ին նրան բաց ծով դուրս բերելու նախորդ փորձերը հաջողությամբ չէին պսակվել։

Չորեքշաբթի անցկացված երրորդ գործողության ընթացքում փրկարարներն օգտագործել էին լողացող հարթակ, որը երկու ափերից աշխատողները քաշում էին պարանների օգնությամբ։ Հարթակից շնաձկան թիակներով ուղղորդում էին դեպի ջրանցքի ելքը, իսկ առջևում տեղադրված ցանցերը թույլ չէին տալիս նրան վերադառնալ։ Մի քանի ժամ տևած աշխատանքից հետո Բուկանգին հասել էր ծովին։ Սակայն, Yonhap գործակալության տվյալներով, ավելի ուշ շնաձկանը նկատել էին մոտակա նավամատույցի մոտ, ուստի պարզ չէ, թե որքան հեռու էր նա լողացել։

Մասնագետները մտահոգված էին կենդանու վիճակով. իրենց դիտարկումներով՝ ջրանցքում անցկացրած մեկ ամսվա ընթացքում շնաձուկը սնվելու նշաններ չէր ցուցաբերել, իսկ ջրի ջերմաստիճանի նվազումը կարող էր լրացուցիչ սպառնալիք ստեղծել նրա առողջության համար։ Պուսանի իշխանությունները Բուկանգիին դարձրել էին քաղաքի թալիսմանը։ Քաղաքապետ Չոն Ջե Սուն շնորհակալություն էր հայտնել բնակիչներին շնաձկան պատմության նկատմամբ հետաքրքրության համար և հույս էր հայտնել, որ կենդանին կկարողանա բարեհաջող ապրել բաց ծովում։