Կայանալիք նախագահական ընտրությունները Սերժ Սարգսյանի եւ Րաֆֆի Հովհաննիսյանի միջեւ պայքարը չեն, այլ ժողովրդի պայքարն իշխանության դեմ: Այդ մասին այսօր՝ հունվարի 21-ին, համակիրների հետ հանդիպման ընթացքում հայտարարել է նախագահի թեկնածու, «Ժառանգություն» կուսակցության առաջնորդ Րաֆֆի Հովհաննիսյանը:

Ըստ նրա` ընտրությունների արդյունքում երկրում հեղափոխություն տեղի կունենա ժողովրդի քվեարկության ճանապարհով:  «Մենք իշխանության կգանք ոչ թե իշխելու, այլ ծառայելու համար: Արդեն մեկ տարի անց 50%-ով կբարձրացվի կենսաթոշակը,  50%-ով կավելացվի գիտության եւ բանակի ֆինանսավորումը, կբացվի 180 հազար նոր աշխատատեղ»:

Րաֆֆի Հովհաննիսյանը նաեւ նշել է, որ  իր ընտրվելուց  հետո Հայաստանը պաշտոնապես կճանաչի Լեռնային Ղարաբաղի Հանրապետության անկախությունը: «2015թ. Հայաստանի եւ Թուրքիայի միջեւ սահմանները կամ բաց կլինեն  առանց նախապայմանների, կամ էլ ապրիլի 24-ին մենք  Ծիծեռնակաբերդում Թուրքիային կհայտնենք մեր նախապայմանների մասին:  Ջավախքը կապող օղակ կդառնա Վրաստանի եւ Հայաստանի միջեւ: Ռազմավարական գործընկեր Ռուսաստանը կմնա նույն ռազմավարական գործընկերը, որի հետ հարաբերությունները ուղղահայաց չեն լինի, այլ հորիզոնական` հիմնված փոխադարձ հարգանքի եւ իրական գործընկերության վրա»:

Լուսանկարը՝ Արսեն Սարգսյանի / NEWS.am