նախընտրելի դարձնելՀայաստանի նախագահի թեկնածու Րաֆֆի Հովհաննիսյանը Ազատություն հրապարակում կայացած մամուլի ասուլիսում խոստացել է պաշտպանել ընտրողների ձայներն իր կյանքի գնով:
«Մենք բոլորս հրաշալի գիտենք, որ Հայաստանի 20-ամյա պատմության ընթացքում ժողովրդի ձայները մշտապես գողացել են, ընտրությունների արդյունքները պարբերաբար կեղծվել են, եւ հասել է ժամանակը, որ ժողովրդի պահանջով մենք պայքար ծավալենք եւ հաղթանակ տանենք: Այդ ցավալի ավանդույթին պետք է վերջ դնել»,- ընդգծել է Հովհաննիսյանը:
Միաժամանակ նա հստակեցրել է, որ պայքարը տանելու է բոլոր սահմանադրական մեթոդներով` հավելելով, թե հետագայում կոնկրետ քայլերը մշակվելու են ժողովրդի հետ լայն քննարկումների արդյունքում:
Որպես հետաքրքիր տարբերակներից մեկը նա նշել է վաղաժամկետ խորհրդարանական ընտրությունների անցկացումը «որում հայ հասարակությունը եւ մենք բոլորս անխուսափելի հաղթանակ կտանենք»:
Ինչպես հաղորդում է NEWS.am-ի թղթակիցը, այս պահին բաց երկնքի տակ անցկացվող մամուլի ասուլիսն ավարտվել է: Վաղը ժամը 17-ին Ազատության հրապարակում կայանալու է թեկնածուի հրավիրած հանրահավաքը:
Լուսանկարն` Արսեն Սարգսյանի/NEWS.am
