նախընտրելի դարձնել«Ամենայն hայոց թամադայի» անունը հայտնի կլինի սեպտեմբերին, բաժակաճառի մրցույթում հաղթողը նվեր կստանա կոտոշ-գավաթ: Մրցույթը կազմակերպել է Հովհաննես Թումանյանի թանգարանը Թանգարանային գիշերվա շրջանակում։
«Ժամանակին Թումանյանն է կրել այդ տիտղոսը: Ընկերներն են նրան այդպես կոչել: Թումանյանը ժամանակին վրացահայերից որպես թամադա կոտոշ է նվեր ստացել՝ իբրեւ գինու գավաթ: Մրցույթի հաղթողը կստանա «Ամենայն հայոց թամադա» երկրորդված տիտղոսը եւ այդ գավաթի կրկնօրինակը կլինի հաղթողի մրցանակը»,- NEWS.am-ի հետ զրույցում ասաց թանգարանի գիտաշխատող Անի Եղիազարյանը:
Քաղաքացիները կարող են իրենց բաժակաճառերն անձամբ տանել Թումանյանի տուն թանգարան, կամ ուղարկել էլեկտրոնային փոստով ([email protected]):
«Մարդիկ բավականին ակտիվ են: Ավելի շատ էլեկտրոնային տարբերակով են մեզ ուղարկում»,- պատմեց Անի Եղիազարյանը:
Սա Թանգարանային գիշերվա շրջանակում թանգարանի միակ նախաձեռնությունը չէր, նրանք սիրիահայերին թույլ էին տվել թանգարանի մուտքի մոտ տաղավարներ տեղադրել եւ իրենց պատրաստած իրերն ու քաղցրավենիքները վաճառել:
«Բուլ-բուլ գորտի աչք», «Կախարդի քսակ», «Ջեհտեր-մեհտեր», ամենաշատ հաճախորդներն ուներ հրուշակագործ Մայդա Փոշկեզենյանի տաղավարը, որը մարդկանց դեպի տաղավար էր հրավիրում Թումանյանի հերոսներից Գիքորի նման՝ «Էստի համեցեք» կոչերով եւ կատակ երգերով:
«Մենք ենք վարպետ խոհարարներ, ունենք մեզ մոտ կարկանդակներ, եկե՛ք, եկե՛ք մեր սեղանին տեսե՛ք, տեսե՛ք մեր հանճարին, հե˜յ: Այս մեկին մեջ՝ պոպոք, դարչին: Այս բոլորը կատուն կերավ: Ե՛կեք, եկե՛ք մեր սեղանին»,- երգում էր հրուշակագործը:
Նշենք, որ «Թանգարանային գիշերն» առաջին անգամ անցկացվել է Ֆրանսիայում 1990-ականների վերջին, հետո միջոցառմանը միացել են Եվրոպայի այլ թանգարաններ: Հայաստանում «Թանգարանային գիշեր» անցկացվում է 2004 թվականից: Ծրագրի նպատակն է այցելուներին հնարավորություն տալ անվճար այցելել թանգարան եւ նրանց մեջ սեր սերմանել թանգարանների նկատմամբ:
