ՆախընտրելիԱպրիլի 10-ի լույս 11-ի գիշերը ղարաբաղա-ադրբեջանական շփման գծի որոշ հատվածներում հակառակորդը խախտել է կրակի դադարեցման պայմանավորվածությունը՝ կիրառելով հրաձգային եւ ականանետային զինատեսակներ: Հակառակորդը կրակահերթեր է արձակել նաև հայ-ադրբեջանական սահմանագոտու հյուսիսարեւելյան հատվածում: Հայկական կողմը հիմնականում ձեռնպահ է մնացել պատասխան գործողություններից: Հակառակորդը կրակի դադարեցման պայմանավորվածությունը խախտել է նաեւ օրվա ընթացքում: Միաժամանակ, ՊԲ հետախուզության տվյալներով, ադրբեջանական զինուժի վերահսկողության տակ գտնվող որոշ հատվածներում արձանագրվել է զորքերի տեղաշարժ:
Զոհվածների մարմինների փոխանակության շրջանակում ապրիլի 10-ին հակառակորդը հայկական կողմին է փոխանցել 18 զոհված զինծառայողների մարմինները. մեկ զինծառայող դեռ անհետ կորած է համարվում, նրա ճակատագիրը պարզելու համար աշխատանքները շարունակվում են: Այսպիսով՝ այս պահին ադրբեջանական ագրեսիայի հետեւանքով հայկական կողմի զոհերի թիվը հասել է 64-ի: Ի դեպ, զոհվածների մարմինների փոխանակման ժամանակ ադրբեջանական կողմից կրակոցներ են հնչել, ինչն արձանագրել են նաև Կարմիր խաչի ներկայացուցիչները:
Ադրբեջանական կողմից հանձնված զոհվածների բոլոր մարմինների վրա կան խոշտանգման ու անարգանքի հետքեր, ինչի մասին իր հայտարարության մեջ նշել է նաև ԼՂՀ ռազմագերիների, պատանդների եւ անհայտ կորածների հարցերով զբաղվող պետական հանձնաժողովը: Հայտարարության մեջ ասվում է , որ ղարաբաղյան կողմը հետամուտ է լինելու, որպեսզի ադրբեջանական կողմի նման պահվածքը ենթարկվի միջազգային հանրության եւ մասնագիտացված կառույցների խստագույն դատապարտմանը, իսկ մեղավորները կրեն պատասխանատվություն:
Զոհվածների մարմինների փոխանակության ընթացքում հայկական կողմին է հանձնվել նաև գլխատված զինծառայող Քյարամ Սլոյանի գլուխը: Արագածոտնի մարզի Արտաշավան գյուղում ապրիլի 9-ին տեղի է ունեցել Քյարամի վերահուղարկավորումը: «Սինջար եզդիների ազգային միավորում» ՀԿ-ի նախագահ Բորիս Մուրազին հայտարարել է, որ Քյարամ Սլոյանին գլխատելով Ադրբեջանը ցույց է տվել իր իրական դեմքը, որ ահաբեկչական խմբավորումներից ոչնչով չի տարբերվում:
Հայկական հետախուզությունը իմացել է, որ Ադրբեջանը դիվերսիոն գործողությունների միջոցով փորձելու է անցնել հարձակման, բայց թե կոնկրետ երբ և որ հատվածից ՝ դժվար էր կռահել՝ հաշվի առնելով Արցախի սահմանի երկարությունը: Այս մասին ասել է Հայաստանի Զինված ուժերի գլխավոր շտաբի պետի տեղակալ գեներալ-լեյտենանտ Մովսես Հակոբյանը՝ նշելով, որ հակառակորդը գործել է գաղտնի, գիշերով` դիվերսիոն երկու հատուկ նշանակության բրիգադի ուժերով եւ փորձել գործել չորս ուղղություններով: Նրա խոսքով՝ հայկական կողմը իմանալով հակառակորդի ծրագրերի մասին՝ համապատասխան միջոցառումներ է իրականացրել , Դրանց շնորհիվ էլ հայկական զինված ուժերին հաջողվել է շատ արագ կասեցնել հակառակորդի առաջխաղացումը, հետո նաև հրադադար պարտադրել: Մովսես Հակոբյանը շեշտել է որ կրակի դադարեցման առաջարկությունը հենց Ադրբեջանն է արել՝ դիմելով Ռուսաստանի գլխավոր շտաբի պետին:
Լևոն Տեր Պետրոսյանը այսօր ծավալուն հարցազրույց է տվել ու պատմել Սերժ Սարգսյանի հետ իր հանդիպման մանրամասները: Առաջին նախագահն ասել է, որ հանդիպումն ինքն է նախաձեռնել՝ ձեռագիր նամակով դիմելով երկրի ղեկավարին:
Առաջին նախագահը հուսադրող է ռազմական դիմակայության օրերին Հայաստանի քաղաքական ուժերի և հասարակության համախմբումը, նաեւ ընդգծել է, որ հիմա սխալների ու բացթողումների համար իշխանություններին մեղադրելու եւ նրանցից հաշիվ պահանջելու ժամանակը չէ: Անդրադառնալով վերջին օրերին Ռուսաստանի բարձրաստիճան պաշտոնյաների այն հայտարարություններին, որ ղարաբաղյան կարգավորման մասին փաստաթուղթը արդեն սեղանի վրա է, Տեր-Պետրոսյանը նշել է, որ խոսքը Մադրիդյան սկզբունքների հիման վրա մշակված եւ կողմերի միջեւ մեծ մասամբ համաձայնեցված ծրագրի մասին է, որը նախատեսում է եւ տարածքների վերադարձ եւ խաղաղապահների տեղակայում: Առաջին նախագահը հիշեցրել է՝ Մադրիդյան սկզբունքները որդեգրել էր երկրորդ նախագահ Ռոբերտ Քոչարյանը, եւ հենց նա էլ Ղարաբաղին զրկել է հակամարտության իրավահավասար կողմի կարգավիճակից։
Ստեղծված իրավիճակին այսօր արձագանքել է նաեւ Ռոբերտ Քոչարյանը: Նա հայտնել է , որ չի պատրաստվում Սերժ Սարգսյանի հետ նմանատիպ հանդիպում նախաձեռնել՝ քննարկելու նպատակով: «Հիմա շատ ավելի կարեւոր է անհապաղ լուծել բանակը ժամանակակից սպառազինությամբ ապահովելու հարցը»,- նշել է Քոչարյանը։
Ապրիլի 10-ին Վալենսիայի հիվանդանոցներից մեկում մահացել է հայտնի ռեժիսոր, հեռուստապրոդյուսեր Սուրեն Թադեւոսյանը։ 40-ամյա ռեժիսորը տեւական ժամանակ բուժում էր ստանում Իսպանիայում։
