Միջազգային տիեզերական կայանի անձնակազմը վայրէջք է կատարել Ղազախստանում, հայտնում է ՌԻԱ Նովոստին։  Տիեզերագնաց Փեգի Ուիթսոնը տիեզերքում է անցկացրել 290 օր, նրա գործընկեր Ջեք Ֆիշերը ու ռուս տիեզերագնաց Ֆյոդոր Յուրչիխինը՝ 136-ական օր։

Կայանի վրա աշխատանքը կշարունակեն ռուս, ամերիկացի ու իտալացի տիեզերագնացները։

Տիեզերագնաց Ռենդոլֆ Բրեզնիկը Յուրչիխինից ստացել է նոր անձնակազմի հրամանատարությունը՝ տիեզերակայանի խորհրդանշական բանալու տեսքով։

ՄՏԿ-ի 6 հոգանոց անձնակազմում հավասար քանակությամբ ներկայացված են Ռուսաստանի ու Արեւմուտքի տիեզերագնացները (ՆԱՍԱ, Եվրոպական տիեզերական գործակալություն, Ճապոնիա ու Կանադա)։ Այդուհանդերձ Ռուսաստանը մտադիր է կրճատել իր անձնակազմը, ինչից էլ հենց մտադիր է օգտվել ՆԱՍԱ-ն, հայտնում է CBS-ը։

Ուիսթոնն այսօրվա դրությամբ ամենափորձառու ամերիկացի տիեզերագնացն է, նա տիեզերակայանում է անցկացրել 665 օր։ Աշխարհում նա ութերորդ տեղում է այս ցուցանիշով։ Յուրչիխինը յոթերորդն է (673 օր)։