նախընտրելի դարձնելՄենք հավատում ենք, որ այս անգամ արդար ընտրություններ են լինելու, բայց կուզեինք, որ անվստահության նշույլ չմնար, իսկ ԿԸՀ նախագահի հրաժարականը կօգներ դրան: Այս մասին, այսօր՝ օգոստոսի 29-ին, ԿԸՀ-ում լրագրողների հետ զրույցում նշեց «Երեւանի հանրություն» նախաձեռնության ցուցակի անդամ Արմեն Հովհաննիսյանը: Նա եւ ցուցակը գլխավորող Անահիտ Թարխանյանը համապատասխան փաստաթղթերն էին բերել ԿԸՀ:
Անահիտ Թարխանյանը նշեց, որ իերնց ցուցակում ընդգրկված է 47 անձ: Կարգախոսն է՝ «Երեւանի հանրություն ի շահ հարազատ քաղաքի»:
Որպես գլխավոր խնդիրներ, որոնք պետք է լուծվեն Երեւանում, Թարխանյանը նշեց առողջապահությունը, շրջակա միջավայրը, սոցիալական խնդիրները, որոնք ներառում են ներառական քաղաք, մանկապարտեզներ, դպրոցներ. «Երկրորդը ենթակառուցվածքային խնդիրներն են, որտեղ մտնում է տրանսպորտը, ինժեներական բոլոր ցանցերը եւ վերջինը՝ աշխատատեղերի մեծացումն ու նոր աշխատատեղերի ստեղծումն է»:
Անդրադառնալով ընտրությունների մասնակից ուժերին, Անահիտ Թարխանյանը նշեց, որ պետք է կարեւորություն տալ ծրագրերին, ոչ թե անձանց: Նա ընդգծեց, որ իրենց ցուցակի վերին հորիզոնականներում անկուսակցականներ են, մասնագետներ են:
Նշվեց, որ ցուցակի երկրորդ հորիզոնականում Արամ Գրիգորյանն է, երրորդում՝ Արմեն Հովհաննիսյանը: Ցուցակում է նաեւ «Դոսաաֆ»-ի ղցեկավար Արկադի Տեր-Թադեւոսյանի տեղակալներից Մուրադյանը, «Երիտասարդ բժիշկների ասոցիացիայից» Անի Երեմյանը: Թվով 14 հկ-ներ են միացել նախաձեռնությանը:
Իր խոսքում Արմեն Հովհաննիսյանը նշեց. «Երեւանի ավագանիում ՀՀԿ խմբակցությունն այսօր 46 անդամ ունի: Մենք չենք ուզում մեզնով փոխարինել ՀՀԿ խմբակցությունը: Մենք գտնում ենք, որ ավագանին պետք է լինի բազմակուսակցական, ազատ ամբիոն, որոշում ընդունելու տեղ: Դրա համար մեզ 46 ընտրված անդամը բավարար է»:
Նշենք, որ «Երեւանի հանրությունը» ձեւավորել են ԳԱԼԱ կուսակցությունը եւ կանաչների կուսակցությունը:
Հիշեցնենք, որ Երեւանի ավագանու արտահերթ ընտրություններին մասնակցելու մտադրություն ունեցող քաղաքական ուժերի համար այսօր՝ օգոստոսի 29-ը վերջին ժամկետն է, երբ կարող են իրենց փաստաթղթերը ներկայացնել ՀՀ կենտրոնական ընտրական հանձնաժողով: Նշենք, որ ընտրությունները տեղի են ունենալու սեպտեմբերի 23-ին: Քարոզարշավը կսկսվի սեպտեմբերի 10-ից եւ կտեւի մինչեւ սեպտեմբերի 21-ը:
Արդեն իսկ 11 քաղաքական ուժեր հայտարարել են Երեւանի ավագանու արտահերթ ընտրություններին մասնակցելու իրենց մտադրության մասին: Երեկ երեկոյի դրությամբ իր փաստաթղթերը ԿԸՀ էր ներկայացրել միայն Ռեֆորմիստների կուսակցությունը:
Ստորեւ ներկայացնում ենք այդ քաղաքական ուժերին եւ նրանց ցուցակը գլխավորող (քաղաքապետի թեկնածուներ) անձանց անունները:
«Քաղաքացիական պայմանագիր» - Հայկ Մարության
«Լույս» դաշինք («Լուսավոր Հայաստան եւ «Հանրապետություն» կուսակցություն) – Արտակ Զեյնալյան
ԲՀԿ – Նաիրա Զոհրաբյան
«Ժառանգություն» Րաֆֆի Հովհաննիսյան
«Երկիր ծիրանի» - Զարուհի Փոստանջյան
ՀՅԴ – Միքայել Մանուկյան
«Ժողովրդավարական ուղի» - Մանուել Գասպարյան
ՀՀՇ – Արարատ Զուրաբյան
«Երեւանի հանրություն» նախաձեռնություն – Անահիտ Թարխանյան
Ռեֆորմիստներ կուսակցություն - Արտակ Ավետյան
«Օրինաց երկիր»- Մհեր Շահգելդյան
