նախընտրելի դարձնելԵրբ թշնամի պետությունները այլևս ուզում են խաղաղության մեջ ապրել, դառնալ հարևան պետություններ, կնքում են համաձայնագիր: Այսօր այդ համաձայնությունը չկա, Ադրբեջանը գտնվում է Հայաստանի տարածքում, ճնշումները Հայաստանի վրա շարունակվում են, դեռ ավելին՝ Ադրբեջանը հավակնություններ ունի Տավուշի տարածաշրջանում: Այս մասին այսօր՝ մարտի 25-ին, Գեղարքունիքի մարզի Մարտունի խոշորացված համայնքում՝ քաղաքացիների հետ տեղի ունեցած հանդիպման ժամանակ ասաց ԱԺ «Հայաստան» խմբակցության ղեկավար Սեյրան Օհանյանը:
«950 կմ սահման ունենք Ադրբեջանի հետ, ինչո՞ւ ես միայն Տավուշի մարզում փորձում սահմանը զատել. ոչ մի քարտեզ չկա, ոչ մի աշխատանք չի տարվել, այդ հատվածում մենք ունենք ամուր պաշտպանություն, ունենք ռազմավարական նշանակության ճանապարհ: Համաձայնագիր չկա, սահմանազատում չես արել, ինչո՞ւ ես գնում ժողովրդին ասում այս տարածքը պետք է տամ, վախեցնում, սպառնում պատերազմով: Մենք պատերազմից վախեցո՞ղ ենք: Եթե նույնիսկ պատերազմ լինի, ինչու՞ ես դու կանխորոշում, որ մենք այդ պատերազմում անպայման պարտվելու ենք: Մենք նորից ոտքի ենք կանգնելու, և կարողանալու ենք մեր երկիրը պաշտպանել, եթե, լինի խելացի ղեկավարություն»,-ասաց Սեյրան Օհանյանը՝ դիմելով ներկայիս իշխանություններին:
Նրա խոսքով, խնդիրը միայն մեկ կամ երկու գյուղի չի վերաբերում, այլ ողջ Հայաստանին, որովհետև սահամանազատման պատճառով սահմանափակվելու է Իջևանի կապը Նոյեմբերյանի և Բերդի հետ, ինչպես նաև, որպես միջպետական ճանապարհ սահմանափակվում է կապը Իրան, Հայաստան, Ռուսաստան, Վրաստան ուղղություններով:
«Դուք տեսել եք և տեսնում եք, թե Վարդենիսում ինչպիսի անվտանգային խնդիրներ կան: Այս իրականության մեջ միակ ելքն այս իշխանություններին հեռացնելն է: Այս իշխանությունները ոչ միայն անգրագետ են, այլև մի ամբողջ ժողովուրդ են ուզում անտեր թողնել, որովհետև սխալը չընդունելը նման են զորքին դաշտում անտեր թողնելուն»,-ասաց Սեյրան Օհանյանը:
Նրա խոսքով, այս նորօրյա պատմության ընթացքում Հայաստանի ամենակարևոր ձեռքբերումը եղել է անկախության հռչակումը: Մեր մտավորականները, կամավորները, ժողովուրդը համախմբվել են և այդ ձեռքբերումը հասցրել են այնպիսի մակարդակի, որ դրանից հետո մենք ազատագրել ենք Արցախը, ունեցել ենք բանակ, եկեղեցի: Սեյրան Օհանյանը շեշտեց նաև, որ նախկինում ունեցել են նաև թերություններ և բացթողումներ, որովհետև չի սխալվում միայն այն մարդը, որը չի աշխատում: Նա հարց է բարձրացնում՝ Ի՞նչ ստացանք մենք այս իշխանափոխությունից:
«Այս իշխանությունները եկան ղեկի և քայքայեցին բոլոր արժեքները, բանակցային գործընթացը, դաշնակիցների հետ հարաբերությունները, բանակը, եկեղեցին, կրթությունը, մշակույթը: Այս իրականության մեջ միակ ելքն այս իշխանություններին հեռացնելն է»,-հավելեց Հայաստան խմբակցության ղեկավարը:
