նախընտրելի դարձնելԱյն, ինչ անում են Հայաստանի իշխանությունները, Թուրքիային դուր է գալիս, բայց Անկարան ու Բաքուն միշտ ավելին են ուզում, միշտ առավելագույնն են ուզում։ Այս մասին NEWS.am -ի թղթակցի հետ զրույցում ասաց թուրքագետ Անդրանիկ Իսպիրյանը։
Նա նշեց, որ Հայաստանի իշխանությունները մի քանի տարի է՝ չեն աշխատում Հայոց ցեղասպանության ճանաչման ուղղությամբ։
«Հայ-թուրքական գործընթացում առաջընթաց չկա. Թուրքիայի պահանջն անընդունելի է, մասնավորապես, խոսքը վերաբերում է այսպես կոչված «Զանգեզուրի միջանցքին»։ Ավելին, Թուրքիայի համար այս հարցը կարևոր է նաև Հայաստանի և Ադրբեջանի հարաբերությունների կարգավորման տեսանկյունից։ Հայ-ադրբեջանական հարաբերությունների կարգավորման հարցում առաջընթաց չկա՝ պայմանավորված Ադրբեջանի ապակառուցողական պահվածքով, որն արտահայտվում է հայ-թուրքական ուղու վրա, քանի որ հայ-ադրբեջանական հարաբերությունների կարգավորումը նախապայման է Անկարայի համար։ Իսկ Թուրքիան կարող է անվերջ որոշակի պայմաններ ներկայացնել»,- հավելեց Իսպիրյանը։
Նրա խոսքով, Արեւմուտքը ցանկանում է Հարավային Կովկասի տարածաշրջանում Թուրքիային Ռուսաստանի դեմ առավելություն տալ:
«Ռուսաստանի և Թուրքիայի միջև հարաբերությունների մակարդակն իջել է, ինչը պայմանավորված է Արևմուտքի հետ Անկարայի «շուկայական» հարաբերություններով, երբ վերջինս Թուրքիայից պահանջում էր Շվեդիային ՆԱՏՕ-ի անդամ դառնալու թույլտվություն տալ` F-16-ների և մեր տարածաշրջանի վրա վերահսկողություն այն բանից հետո, երբ կթուլանա Ռուսաստանի դերը»,- նշել է փորձագետը։
Նա ասաց, որ ռուս սահմանապահների մասին խոսակցությունների համատեքստում թուրքերը ոգեշնչված են նրանով, որ ցանկանում են Ռուսաստանին դուրս բերել Հայաստանից։
«Ռուսաստանն այնքան թույլ է, որ թույլ տվեց Թուրքիային և Ադրբեջանին կլանել Արցախը, նա թույլ է, որ կարողանա իսկապես պաշտպանել Հայաստանը Թուրքիայի հնարավոր հարձակումից։ Միևնույն ժամանակ, հակառուսական տրամադրությունները, որոնք գեներացվում են Հայաստանում, շատ լավ արդարացման հիմք են Ռուսաստանի համար»,- ասում է Իսպիրյանը։
Նա հիշեցրել է, որ Իրանը լուրջ ջանքեր է գործադրել՝ կանխելու Թուրքիայի և Ադրբեջանի գործողությունները Հայաստանի դեմ։
«Բայց Իրանի համար հեշտ չի լինի կռվել ամբողջ աշխարհի դեմ, քանի որ Թուրքիային հարվածը կհրահրի ամբողջ ՆԱՏՕ-ի ագրեսիան Թեհրանի դեմ։ Իրանը հանուն Հայաստանի լուրջ քայլեր չի ձեռնարկի, այլ կփորձի հնարավորինս զսպել այդ միտումները»,- եզրափակեց թուրքագետը։
