նախընտրելի դարձնելՀայաստանում «Գաղտնազերծման մասին» օրենքը ոչ հիմա, ոչ էլ ապագայում չի ընդունվի: Այդ մասին «Արմենպրեսս» գործակալությանը հայտնել է Հայաստանի Ազգային անվտանգության ծառայության տնօրեն, գեներալ-գնդապետ Գորիկ Հակոբյանը:
Նրա խոսքով, կարծիք է ստեղծվում, որ նման նախաձեռնությամբ հանդես եկողները խորությամբ չեն ընկալում ՀՀ անվտանգության մարմինների դերն ու նշանակությունը, պատկերացում չունեն, թե նման նախաձեռնությունն ինչ հետեւանքներ կարող է ունենալ անվտանգության համակարգի եւ հետեւապես` պետության համար:
«Մի շարք եվրոպական երկրներ, այդ թվում, հետխորհրդային մի քանի հանրապետություններ նմանատիպ քայլեր ձեռնարկեցին այս ուղղությամբ: Պետք է նշեմ, որ դա չարժանացավ հասարակության լայն խավերի հավանությանը եւ ժամանակին կասեցվեց:
Այստեղ պետք է նշել այն փաստը, որ ոչ մի հատուկ ծառայություն չի գործում եւ չի կարող գործել առանց գործակալական ցանցի, եւ նույնիսկ նախկինում համագործակցած գործակալների բացահայտման նախադեպը զգալի հարված կհասցնի անվտանգության ողջ համակարգին:
Հիմա մի քանի խոսք գործակալների մասին: Նրանց ճնշող մեծամասնությունը եւ խորհրդային ժամանակաշրջանում եւ այժմ պարկեշտ, հայրենասեր, մարդկային լավագույն հատկանիշներով օժտված անձնավորություններ են:
Արժե նշել, որ ելնելով երկրի զարգացման արդի իրողությունից, անկախ պետականության գոյությունից, հիմնովին վերաիմաստավորվել է ծառայության կողմից լուծվող քաղաքացու, հասարակության եւ պետության անվտանգության ապահովմանն ուղղված խնդիրները:
Վերջին տարիներին Հայաստանի տարածքում արտասահմանյան լրտեսների բացահայտման հիմնական վաստակը անվտանգության ծառայության հետ համագործակցող անձնավորություներինն է, որոնց մասին կոնկրետ տեղեկությունները համաձայն ՀՀ օրենքի հանդիսանում են պետական գաղտնիք:
Կարծում եմ, որ «Գաղտնազերծման մասին» օրենքը ոչ հիմա, ոչ էլ ապագայում չի ընդունվի: Անկախ բոլոր քաղաքական ելեւէջներից մեր հայրենակիցները ամեն ինչից վեր կդասեն Հայրենիքի անվտանգությունը»,- ասել է Գորիկ Հակոբյանը:
Նշենք, որ օրինագծի հեղինակները նշում են, որ օրենքը վերաբերում է օտար գործակալներին բացահայտելուն եւ որեւէ կապ չունի Հայաստանի Ազգային անվտանգության ծառայության աշխատակիցների հետ: Օրինագիծը ենթադրում է այն պաշտոնների աշխատանքից ազատում, ովքեր մինչեւ 1991-ի սեպտեմբերի 21-ը կապ են ունեցել օտարերկրյա հատուկ ծառայությունների հետ:
