Նախընտրելի
ԱՄՆ նախագահ Դոնալդ Թրամփը կարծում է, որ լրատվամիջոցները դիտավորյալ սխալ են ներկայացնում Իրանի հետ հնարավոր պատերազմը. նա ինքը կնախընտրեր համաձայնագիրը։
«Իրանի հետ հնարավոր պատերազմի մասին գրված ամեն ինչ սխալ է ներկայացված, և դիտավորյալ։ Որոշումը միայն իմն է։ Ես կնախընտրեի համաձայնագիրը, բայց եթե մենք համաձայնագիր չկնքենք, դա շատ վատ օր կլինի այս երկրի և, ցավոք, նրա ժողովրդի համար», - գրել է Թրամփը TruthSocial սոցիալական ցանցում։
Նա նաև նշել է, որ լրատվամիջոցների պնդումները, թե Միացյալ շտաբների պետերի կոմիտեի նախագահ, գեներալ Դեն Քեյնը չի աջակցում Իրանի դեմ արշավին, նույնպես սխալ են։
«Գեներալ Քեյնը, ինչպես մենք բոլորս, չի ցանկանում պատերազմ տեսնել, բայց եթե որոշում կայացվի Իրանին ռազմական բախվելու մասին, նա կարծում է, որ հեշտ կլինի հաղթել», - ընդգծել է նախագահը։
Նա հավելել է, որ Քեյնը չի արտահայտվել ռազմական գործողությունների դեմ, ինչպես նաև չի խոսել սահմանափակ հարվածների մասին և կղեկավարի գործողությունը «եթե հրաման տրվի»։
Axios-ը, հղում անելով աղբյուրներին, հաղորդել է, որ Քեյնը զգուշացրել է Թրամփին և բարձրաստիճան պաշտոնյաներին, որ Իրանի դեմ ռազմական արշավը կարող է զգալի ռիսկեր պարունակել, մասնավորապես՝ ձգձգվող հակամարտության մեջ ներքաշվելու հավանականությունը։
Միևնույն ժամանակ, ըստ պորտալի, ԱՄՆ վարչակազմը շարունակում է քննարկել Իրանի վերաբերյալ տարբերակները և դրանցից յուրաքանչյուրի հետևանքները։
