ՆախընտրելիԱպրիլի 14-ին բողոքի ակցիա է տեղի ունեցել Հայաստանի գլխավոր դատախազության շենքի առջև։ Մասնակիցները պահանջել են պատասխանատվության ենթարկել այն անձանց, ովքեր վիրավորում են արցախահայերին և պառակտում են մտցնում հասարակության մեջ։
«Վերածնվող Արցախ» ՀԿ-ի ղեկավար Անաստաս Իսրայելյանը մատնանշել է արցախահայերի և Հայաստանի հայերի միջև պառակտում մտցնելու փորձերը՝ նկատելով, որ դա սպառնալիք է ողջ ժողովրդի համար։ «Մենք դիմում ենք Հայաստանի գլխավոր դատախազին, որպեսզի նա թույլ չտա նման պառակտումը և զբաղվի այն սրիկաներով, ովքեր դրանով են հաց վաստակում։ Նրանք ունեն բոլոր անհրաժեշտ հնարավորությունները նման մարդկանց պատժելու համար, որպեսզի նման երևույթները չկրկնվեն», — ընդգծել է նա։ Իսրայելյանի գնահատմամբ՝ եթե այս երևույթն անտեսվում է, նշանակում է, որ դրա թիկունքում որոշակի ուժեր են կանգնած։ Նա չի բացառել, որ դա արվում է պետական մակարդակով։
Նա պահանջել է բացահայտել այդ անձանց և պատասխանատվության ենթարկել, որպեսզի դադարեցվեն արցախահայերի հասցեին հնչող վիրավորանքները, հակառակ դեպքում՝ հնարավոր են «վենդետայի» դրսևորումներ։ Իսրայելյանի խոսքով՝ սա իրականացվում է այն բանից հետո, երբ երկրի առաջին և երկրորդ դեմքերն անընդունելի արտահայտություններ են թույլ տվել արցախահայերի հասցեին և մնացել անպատիժ։
Ըստ նրա՝ նպատակաուղղված աշխատանք է տարվում ժողովրդի տարբեր հատվածներին միմյանց դեմ հանելու ուղղությամբ։ «Եթե առողջական խնդիրներ ունեցող 18-ամյա տղային օպերատիվ կերպով ձերբակալում են, ապա նույն մոտեցումը կարող էին կիրառել նաև այս դեպքում։ Այս իրավիճակի պատասխանատվությունը կրում է երկրի ղեկավարությունը, և առաջին հերթին հենց նրանք պետք է ձերբակալվեին, որպեսզի հասարակության մեջ անպատժելիության զգացում չառաջանար», — ընդգծել է Իսրայելյանը։
ՀԿ ղեկավարը վստահություն է հայտնել, որ Հայաստանի վարչապետ Նիկոլ Փաշինյանն ունեցել է բոլոր հնարավորությունները Լեռնային Ղարաբաղը հայկական պահելու և այնտեղ հայերի բնակությունն ապահովելու համար, սակայն դրա փոխարեն հիմա նրանց հրահանգում է, թե ինչպես պետք է ապրեն։ «Հայաստանի իշխանություններն իրենց խոստումների նույնիսկ 1%-ը չեն կատարել», — հայտարարել է նա։
Փաստաբան Էրիկ Բեգլարյանն իր հերթին հույս է հայտնել, որ Գլխավոր դատախազությունը վերահսկողության տակ կվերցնի ՀՀ քրեական օրենսգրքի 329-րդ հոդվածի 3-րդ մասով (ազգային, ռասայական կամ կրոնական հիմքով ատելության, խտրականության կամ թշնամանքի հրապարակային կոչեր) նախատեսված քրեական գործը։ «Մենք նաև հրապարակային ներողություն կպահանջենք», — նշել է նա։ Բեգլարյանն անընդունելի է համարել նաև մետրոյում Արցախի զոհված զինծառայողի դստեր նկատմամբ Փաշինյանի դրսևորած վարքագիծը՝ նշելով, որ այն մնացել է անպատիժ։
Երևանի ավագանու «Մայր Հայաստան» խմբակցության անդամ Նարե Հայրապետյանը նշել է պատասխանատվության ենթարկելու անհրաժեշտությունը նաև այն կայքերի աշխատակիցներին, որոնք, նրա խոսքով, վարձված են թուրքերի կողմից և զբաղված են հասարակության պառակտմամբ ու արցախահայերին վիրավորելով։ «Սա «բաժանիր, որ տիրես» սկզբունքն է։ Այլ կերպ Նիկոլը (ՀՀ վարչապետը – խմբ.), Ալիևների ու Էրդողանի (Ադրբեջանի և Թուրքիայի նախագահները – խմբ.) հետ միասին չի կարողանա իրականացնել իր ծրագիրը», — նշել է նա։ Հայրապետյանի խոսքով՝ միամտություն է կարծել, թե գլխավոր դատախազ Աննա Վարդապետյանը կբավարարի բողոքի ակցիայի մասնակիցների պահանջները։ «Հակառակ դեպքում Հայաստանում թուրքական հինգերորդ շարասյուն չէր լինի, և առավել ևս՝ Փաշինյանն այժմ գահին բազմած չէր լինի», — պարզաբանել է նա։
Ակցիայի ավարտին մասնակիցները նամակ են հանձնել գլխավոր դատախազությանը։
