ՆախընտրելիՀայաստանի իշխանություններն այնպիսի քաղաքականություն են վարում, որի հետևանքով արցախցիները ստիպված են լինում հեռանալ նաև Հայաստանից։ Այս մասին «Եռաբլուր» զինվորական պանթեոնում լրագրողների հետ զրույցում հայտարարել է «Ուժեղ Հայաստան» խմբակցության պատգամավոր Առեգա Հովսեփյանը։
Նրա խոսքով՝ երկրում մնացած արցախցիների բազմաթիվ սոցիալական խնդիրները վկայում են այն մասին, որ պետական անհրաժեշտ աջակցությունը փաստացի բացակայում է։
«Ես սա հատուկ նպատակաուղղված պետական քաղաքականություն եմ համարում, որպեսզի արցախցիները ստիպված լինեն հեռանալ նաև Հայաստանից։ Չկա՛ Արցախ, չկա՛ն արցախցիներ Հայաստանում, փակված է արցախյան էջը. ես հենց այսպես եմ դա ընկալում», - ասել է Հովսեփյանը։
Պատգամավորը նշել է, որ արցախցիների սոցիալական խնդիրները շարունակում են շատ մնալ, և, նրա խոսքով, շատերն արդեն չգիտեն էլ՝ ում դիմել օգնության համար։ Նա վկայակոչել է արցախցիների շրջանում գործազրկության տվյալները, որն, ըստ նրա, հասնում է 50 տոկոսի։
«Սոցիալական խնդիրներն այնքան շատ են, որ Արցախից դուրս հայտնված ու նեղության մեջ գտնվող արցախցիներն արդեն չգիտեն՝ որ դուռը ծեծեն», - հայտարարել է նա։
Հովսեփյանն ընդգծել է, որ իրենց խմբակցությունը մտադիր է այս հարցերը բարձրացնել խորհրդարանական հանձնաժողովներում և արցախցիներին աջակցելու առանձին միջոցառումներ առաջարկել։ Նրա տեղեկացմամբ՝ դեռևս նախընտրական շրջանում դաշինքը մշակել էր հատուկ ծրագիր, որը լրացուցիչ սոցիալական երաշխիքներ էր նախատեսում Արցախից բռնի տեղահանվածների համար։
«Մենք մշակել էինք ընդհանուր մոտեցում, որի շրջանակներում արցախցիների համար առանձին արտոնություններ էին սահմանված», - ասել է պատգամավորը՝ հավելելով, որ գործող ծրագրերն իրենց չեն արդարացնում։
Հովսեփյանը Հայաստանի իշխանություններին մեղադրել է նաև Արցախի հայկական պատմամշակութային ժառանգության դեմ Ադրբեջանի գործողություններին պատշաճ չարձագանքելու համար։ Նա շեշտել է, որ Երևանը չպետք է անտարբեր մնա հայկական հուշարձանների ոչնչացման կամ պղծման նկատմամբ՝ անկախ նրանից, թե որտեղ են դրանք գտնվում։
«Որտեղ էլ որ ավերվեն կամ պղծվեն հայկական պատմամշակութային հուշարձանները՝ Արգենտինայից, Ռուսաստանից և Մեծ Բրիտանիայից մինչև Հնդկաստան, Հայաստանի գլխավոր ամբիոնից պետք է դատապարտող խոսք հնչի», - ասել է պատգամավորը։
Անդրադառնալով Հայաստանում հուշարձաններ վերականգնելու Ադրբեջանի մտադրության մասին լուրերին՝ Հովսեփյանը հիշատակել է նաև ադրբեջանական իշխանությունների ներկայացուցչի այցը Գանձասար։ Նա հայտարարել է, որ հայկական ժառանգության հանդեպ Ադրբեջանի գործողությունները պետք է խիստ գնահատականի արժանանան Երևանի կողմից։
«Մենք ենք մեր մշակույթի, մեր պատմության և մեր ինքնության տերը», - ընդգծել է պատգամավորը։
Հովսեփյանը 2023 թվականի սեպտեմբերին զոհվածների հիշատակի օրը համազգային սգո օր է հայտարարել և շեշտել, որ Արցախը ոչ միայն արցախահայության հայրենիքն է, այլև ողջ հայ ժողովրդի պատմական հիշողության մի մասը։
«Ես Արցախը հիշում եմ միայն հաղթանակած ու երբեք ծնկի չեկած, արցախցիներին էլ ընկալում եմ միայն որպես հաղթանակած և երբեք ծնկի չեկած ժողովուրդ», - եզրափակել է նա։
