նախընտրելի դարձնելՀայաստանի և Ադրբեջանի միջև խաղաղության համաձայնագիրն ու TRIPP նախագիծը պետք է դիտարկվեն զուգահեռ։ Այս մասին նոյեմբերի 2-ին Ազգային ժողովի ավանդական ճեպազրույցների ժամանակ հայտարարել է «Ուժեղ Հայաստան» խմբակցության քարտուղար Տիգրան Աբրահամյանը։
Նրա խոսքով՝ «Ուժեղ Հայաստանը» դեմ չէ TRIPP-ին, սակայն անհրաժեշտ է համարում հաշվի առնել բանակցային գործընթացների ժամանակագրությունը։ «Պետք է հասկանալ ընդհանուր ժամանակագրությունը։ TRIPP-ն ու խաղաղության գործընթացը մեկնարկել են զուգահեռ, և մեր հասարակության մեջ TRIPP-ը նույնպես նույնացվում է խաղաղության համաձայնագրի հետ», — նշել է նա։ Աբրահամյանն ուշադրություն է հրավիրել Կառավարության ղեկավարի, ինչպես նաև արտաքին գործերի և միջազգային առևտրի նախարարի այն հայտարարություններին, թե առանց Սահմանադրության փոփոխության խաղաղության համաձայնագիրը չի կարող կյանքի կոչվել։ «Ընդ որում՝ նրանք պնդում են, թե բանակցություններում նման պահանջ չկա, բայց զուգահեռաբար մենք տեսնում ենք Ադրբեջանի հրապարակային պահանջները, իսկ իշխանություններն իրենց քայլերով մեզ նույնպես տանում են դեպի նոր Սահմանադրություն», — պարզաբանել է ընդդիմադիր գործիչը։
Նրա համոզմամբ՝ խաղաղության համաձայնագիրն ու TRIPP-ը խորհրդարանին պետք է ներկայացվեին միասին։ «Անկասկած, եթե խաղաղության համաձայնագիրը ստորագրվեր և ներկայացվեր TRIPP-ի հետ մեկտեղ, «Ուժեղ Հայաստանը» բոլորովին այլ կերպ կքվեարկեր», — ընդգծել է նա։
Նույն խմբակցության պատգամավոր Արեգա Հովսեփյանն իր հերթին շեշտել է նախաստորագրված խաղաղության համաձայնագիրն ու TRIPP նախագիծը հստակորեն տարանջատելու անհրաժեշտությունը։ «Երբ խոսում ենք խաղաղության նախաստորագրված համաձայնագրի մասին, ԱՄՆ-ն այնտեղ ընդամենը վկա է, երաշխավորներ չկան», — նշել է նա։ Հովսեփյանը հավելել է, որ TRIPP-ի հարցում խմբակցության դիրքորոշումը հստակ է՝ նախագծի լավագույն երաշխիքը մի քանի երաշխավորով ապահովված խաղաղության համաձայնագիրն է։ «Սա՛ է տարբերությունը։ Մի քանի երաշխավոր ունեցող խաղաղության համաձայնագիրը շատ հստակ և դիպուկ բանաձև է, որն արտացոլում է մեր խմբակցության մոտեցումը», — մանրամասնել է պատգամավորը։
Նա ընդգծել է, որ TRIPP-ն անհրաժեշտ է, սակայն դրա իրականացումը պետք է անվտանգ լինի Հայաստանի և նրա քաղաքացիների համար։ «Մեզ համար TRIPP-ն անհրաժեշտ է։ Բայց մենք ցանկանում ենք, որ այն լինի անվտանգ, որպեսզի մեր քաղաքացիներն իրենց պաշտպանված զգան այդ նախագծի շրջանակում։ Պետք է անել հնարավորը ռիսկերն առավելագույնս նվազեցնելու համար. ռիսկեր կարող են լինել ցանկացած նախագծում», — ասել է Հովսեփյանը։
Պատգամավորի խոսքով՝ խմբակցությունն առաջարկում է ներկայացնել մի քանի երաշխավոր ունեցող խաղաղության համաձայնագիր, քանի որ դա կդառնա TRIPP-ի ամենահուսալի երաշխիքը։ «Իշխանություններն իրենք էլ նշում են, որ չեն կարող հարյուրտոկոսանոց երաշխիք տալ առ այն, որ այս նախագծերը կյանքի կկոչվեն։ Մենք նաև ցանկանում ենք երաշխիքների ինստիտուտն ավելի կայուն դարձնել», — եզրափակել է նա։
