«Նուբարաշեն» քրեակատարողական հիմնարկում պահման պայմանները չեն համապատասխանում միջազգային չափանիշներին, իսկ պարբերական վերանորոգումների միջոցով խնդիրը լուծելու փորձերը արդյունք չեն տալիս։ Հիմնարկն անհրաժեշտ է փակել և դրա փոխարեն նոր բանտ կառուցել։ Այս մասին հայտարարել է Հայաստանի մարդու իրավունքների պաշտպան Անահիտ Մանասյանը՝ պետական իշխանություններին կոչ անելով անհապաղ զբաղվել խնդրի լուծմամբ։

Մանասյանի խոսքով՝ «Նուբարաշենում» իրավիճակը հայեցակարգային և համակարգային փոփոխություններ է պահանջում։ Վերջին տարիներին հիմնարկում բազմիցս փորձել են վերանորոգման աշխատանքներ իրականացնել, սակայն փորձը ցույց է տվել, որ նման միջոցները չեն կարող ապահովել պահման պայմանների կայուն բարելավում։ Ինչպես պարզաբանել է ՄԻՊ-ը, վերանորոգումից ընդամենը մի քանի ամիս անց պայմանները փաստացի վերադառնում են այն վիճակին, որում եղել են աշխատանքներն սկսելուց առաջ։ Ուստի, նրա համոզմամբ, անհրաժեշտ է սկզբունքորեն այլ մոտեցում՝ գործող հիմնարկի փակում և նորի կառուցում։

Մանասյանն ընդգծել է, որ այս հարցը բարձրացնում է մարդու իրավունքների պաշտպանի պաշտոնում իր աշխատանքի առաջին իսկ օրերից։ Նա բազմիցս հրապարակային հայտարարություններ է արել «Նուբարաշենում» տիրող իրավիճակի վերաբերյալ, այդ թվում՝ խնդրին նվիրել է առանձին հաղորդագրություններ, որոնք հրապարակվել են ՄԻՊ-ի պաշտոնական կայքում։ Օգտվելով առիթից՝ նա կրկին դիմել է պետական իշխանություններին՝ պահանջելով հնարավորինս կարճ ժամկետում լուծում գտնել։ Միաժամանակ Մանասյանը Ազգային ժողովի թե՛ քաղաքական մեծամասնության, թե՛ ընդդիմադիր փոքրամասնության ներկայացուցիչներին կոչ է արել հրաժարվել այս խնդրի շուրջ քաղաքական վեճերից և նստել մեկ սեղանի շուրջ՝ իրավիճակից համատեղ ելք գտնելու համար։

ՄԻՊ-ն ընդունել է, որ խնդիրը մեկ օրում լուծել հնարավոր չէ, և դրա համար ժամանակ ու մտածված մոտեցում է անհրաժեշտ։ Սակայն, նրա խոսքով, խոսքը պետք է լինի հենց հայեցակարգային և համակարգային լուծման մշակման մասին, իսկ քաղաքական ուժերի ջանքերի միավորումը չի խոչընդոտի այդ գործընթացին, այլ, ընդհակառակը, կնպաստի դրա իրականացմանը։