նախընտրելի դարձնելԸստ վերջին տվյալների` Ալժիրի Ին Ամենաս գազային համալիրի տասներկու պատանդներ մեռած են համարվում: Այդ մասին հայտնել է Ալժիրի պաշտոնական APS գործակալությունը: Զոհվածների ազգությունը չի հաղորդվում:
Ավելի վաղ APS-ը տեղեկություն էր տարածել, որ ավելի քան 600 պատանդներ, այդ թվում՝ 573 ալժիրցի եւ հարյուր արտասահմանցի, ազատվել էին ալժիրյան զինվորականների հատուկ գործողության ընթացքում: Գործողությունը դեռեւս շարունակվում է համալիրի գազի վերամշակման հատվածում, որտեղ տեղակայված են «Արյունով ստորագրողները» խմբավորման ահաբեկիչները:
ԻՏԱՌ-ՏԱՍՍ-ը հաղորդում է, որ զինված գրոհայինները շարունակում են իրենց մոտ պահել յոթ արտասահմանցի պատանդների` երեք բելգիացի, երկու ամերիկացի, ճապոնացի եւ բրիտանացի:
Ըստ առկա տեղեկատվության` ահաբեկիչների խումբը հունվարի 17-ի երեկոյան յոթ պատանդների հետ տեղափոխվել է գործարան, հաղորդում է «ՌԻԱ Նովոստին»:
Ահաբեկիչների ղեկավար Մոխթար Բելմոխթարը Ֆրանսիային եւ Ալժիրին առաջարկում է բանակցություններ սկսել Ազավադում Ֆրանսիայի կողմից իրականացվող պատերազմի դադարեցման շուրջ: Բացի դրանից, հանցագործները ցանկանում են ամերիկացի պատանդներին փոխանակել ԱՄՆ-ում ազատազրկված երկու ծայրահեղական իսլամիստների` Պակիստանի քաղաքացուհի Աաֆիա Սիդիկիի եւ «Կույր շեյխ» մականունով եգիպտացի Օմար Աբդել Ռահմանի հետ:
ԱՄՆ-ի պետդեպարտամենտի մամուլի ծառայության ղեկավարը ժխտել է իսլամիստական ծայրահեղականներին ազատելու հավանականությունը: «ԱՄՆ-ն բանակցություններ չի վարում ահաբեկիչների հետ», - հայտարարել է Նուլանդը:
