ՆախընտրելիԳյումրիում ապրիլի 26-ին տաքսու վարորդ Արտակ Մարատի Անդրեասյանին հրազենային վնասվածք հասցնելու մեջ կասկածվող՝ Գյումրու քաղաքապետարանի սպորտի բաժնի նախկին պետ՝ Հրաչիկ Խաչատրյանի որդուն, նախկինում դատապարտված 30-ամյա Արկադիկ Խաչատրյանին բերման ենթարկելու ուղղությամբ հետախուզական աշխատանքները դեռ շարունակվում են: Այս մասին NEWS.am-ին ասաց Շիրակի մարզի դատախազ Րաֆֆի Ասլանյանը:
Ըստ դատախազի` ոստիկանությունը բավարար հիմքեր է ձեռք բերել Արկադիկ Խաչատրյանին կասկածյալ ճանաչելու համար, եւ դեռ 22 օր առաջ որոշում են կայացրել որպես խափանման միջոց կիրառել կալանավորումը, սակայն վերջինիս հայտնաբերել չի հաջողվում:
«Ներկայումս ոստիկանությունը ձեռնարկում է միջոցառումներ անձին հայտնաբերելու եւ նախաքննական մարմնին ներկայացնելու համար, գործով կան ապացույցներ անձին որպես կասկածյալ ներգրավելու համար: Անձը ներկայումս արդեն իսկ հանդիսանում է մեղադրյալ, քանի որ դատավարական որոշումն արդեն կայացրած է, ինչ վերաբերում է ապացույցների տեսակներին ու բովանդակությանը դա համարվում է նախաքննության գաղտնիք եւ հրապարակման ենթակա չէ»- NEWS.am-ին ասաց Շիրակի մարզի դատախազը:
Րաֆֆի Ասլանյանը ասաց, որ դեպքի վայրից հայտնաբերվել եւ առգրավվել է ատրճանակի 2 գնդակ եւ 3 պարկուճ, նախաքննական փուլում հարցաքննվել են Արկադիկ Խաչատրյանի ընկերներն ու հարազատները, սակայն նրանք վերջինիս գտնվելու վայրի մասին ոչինչ չեն հայտնել:
Գյումրու բժշկական կենտրոնի տնօրեն Արմեն Իսահակյանն էլ NEWS.am-ի թղթակցին հետ զրույցում ասաց, որ տուժած Արտակ Անդրեասյանը երկու օր առաջ դուրս է գրվել հիվանդանոցից: Արկադիկ Անդրեասյանն ու հարազատները, սակայն, չցանկացան խոսել դեպքի մասին, միայն ասացին, որ իրենց տղան արդեն լավ է, իսկ հարուցված քրեական գործով չեն էլ հետաքրքրվել:
Ինչպես ավելի վաղ հայտնել էր NEWS.am -ը, ապրիլի 26-ին, ժամը 22:00-ի սահմանում կրակոցներ են հնչել Գյումրու Բուլվարային թաղամասում: Հիվանդանոց է տեղափոխվել Գյումրի քաղաքի Վարդ-բաղ 1 թաղամասի 1-ին շենքի 11-րդ բնակարանի բնակիչ, Արտակ Մարատի Անդրեասյանը՝ մեջքի հատվածում հրազենային վնասվածքով: Հարուցվել է քրեական գործ Ք.Օ 104 եվ 235 հոդվածների ենթակետերի, այն է՝ սպանություն կատարելը ու ապօրինի զենք կրելը:
