նախընտրելի դարձնելՄարտի 6-ին, ժամը 16:00-ին, Ազատության հրապարակում տեղի կունենա Րաֆֆի Հովհաննիսյանի եւ «Ժառանգություն» կուսակցության ամփոփ հաշվետվությունը: Այս մասին իր հայտարարության մեջ նշել է «Ժառանգություն» խմբակցության պատգամավոր Զարուհի Փոստանջյանը:
Նա նաեւ հայտարարել է.
«Քսանհինգ տարի է անցել մեր պատմական հայրենիքի մի փոքր մասում անկախ պետականության վերականգնման հռչակումից: Անկախության հռչակումը նպաստեց համահայկական գաղափարի ներքո համախմբվելուն, ինչի արդյունքը հայ ժողովրդի հաղթանակն էր իրեն պարտադրված պատերազմում:
Սակայն մեր հավաքական ուժին ավելին անել, Անկախություն հռչակելուց եւ պարտադրված պատերազմում հաղթանակ արձանագրելուց բացի, այս տարիների ընթացքում այդպես էլ չհաջողվեց:
Նոր ձեւավորվող աշխարհակարգում հայ ժողովրդի ազգային անվտանգության ապահովման համար կարեւորագույն անհրաժեշտություն է Հայկական քաղաքական օրակարգի ձեւակերպումը, ընդունումը եւ իրագործումը, որը պետք է արմատականորեն տարբերվի այս 25 տարիների՝ երեք նախագահության սնանկ, գավառական, հետամնաց քաղաքական իրականությունից:
Հայ ժողովուրդը կրկին կարիք ունի հավաքական ուժի ներքո վերահաղթահարելու իրեն պարտադրված գաղափարաքաղաքական պատերազմը` հավատարիմ մնալով իր ազգային շահի հետապնդման գաղափարախոսությանը եւ օրակարգին:
«Ժառանգություն» կուսակցությունը, սպասարկելով իր կողմից ընդունված քաղաքական ծրագիրը, պատրաստ է եւ շարունակելու է ազգային եռագույնի ներքո կյանքի կոչել բովանդակ հայության պահանջն ու իղձերը:
Մեր ճանապարհը դժվար է, բայց անցանելի:
Ապացուցված է, որ ուժը նրա ձեռքում է, ով պայքարում է հանուն գաղափարի, իսկ հավաքական ուժը հնարավորություն է ընձեռնում հաղթանակի հասնել:
Վերանայելով անցյալի սխալները` հավաքական ուժի միջոցով պետք է ձեւակերպենք Հայկական քաղաքական օրակարգը, ընդունենք այն եւ սկսենք իրագործել:
Ուրեմն, ի կատարումն Հայկական քաղաքական օրակարգի` Րաֆֆի Հովհաննիսյանի առաջնորդությամբ մենք միասին այցելելու ենք Հայաստանի բոլոր բնակավայրերը, եւ առաջիկայում, յուրաքանչյուր ուրբաթ օր, քաղաքական գործընթացների վերաբերյալ հանրությանը հաշվետվություն ենք ներկայացնելու Ազատության հրապարակում:
Մարտի 6-ին, ժամը 16:00-ին, Ազատության հրապարակում տեղի կունենա Րաֆֆի Հովհաննիսյանի եւ «Ժառանգություն» կուսակցության ամփոփ հաշվետվությունը»:
