նախընտրելի դարձնելԱպրիլի 8-ին ոստիկանության պետ Վլադիմիր Գասպարյանն անցկացրեց հերթական գործնական պարապմունքը, որին մասնակցում էին ոստիկանության Երեւան քաղաքի եւ մարզային վարչությունների ու տարածքային բաժինների ղեկավարները:
Ապրիլի 24-ի միջոցառումների համատեքստում անդրադառնալով արտաքին ծառայությունների եւ հասարակությանը ծառայություններ մատուցող ստորաբաժանումների խնդիրներին՝ ոստիկանության պետը կարեւորեց հատկապես կատարողական կարգապահության բարձրացման անհրաժեշտությունը:
Վլադիմիր Գասպարյանը պահանջեց սկզբունքային լինել արտաքին ծառայության կատարելագործման ուղղությամբ՝ սկսած ոստիկանության ծառայողի արտաքին տեսքից ու պահվածքից, մինչեւ հասարակական կարգի պահպանման ընթացիկ ու կանխարգելիչ միջոցառումներ:
Խոսելով ոստիկանության բարեփոխման երկրորդ փուլի առաջնահերթությունների մասին՝ ոստիկանության պետը նշեց, որ այդ գործընթացն անշրջելի է, եւ այդ իրողության գիտակցումը պետք է ունենա ողջ համակարգը՝ ղեկավարից մինչեւ շարքային: Միայն այդպես է հնարավոր իրականացնել այն քաղաքականությունը, որը որդեգրել ու որին հավատարիմ է լինելու ոստիկանությունը:
Խոսելով ժամանակին ոստիկանության գործունեության մեջ տեղ ունեցած արատավոր երեւույթները սկզբունքորեն բացառելու մասին՝ Վլադիմիր Գասպարյանն անդրադարձավ նոր պայմաններում հասարակության հետ աշխատելու հիմնախնդիրներին, այն մեթոդներին, որոնցով նոր իրողությունները պետք է հասանելի դառնան քաղաքացիներին:
Այնուհետեւ ոստիկանության պետի առաջին տեղակալ Հունան Պողոսյանը եւ տեղակալ Սամվել Հովհաննիսյանը գործնական պարապմունքի մասնակիցների հետ մանրամասնեցին պլանային թեմաները եւ առարկայական քննարկումից հետո ըստ ստորաբաժանումների տվեցին կոնկրետ ցուցումներ ու հանձնարարարկաններ:
