նախընտրելի դարձնելԱպրիլի 24-ից երկու օր առաջ Հայոց ցեղասպանության հուշահամալիր տանող ճանապարհները բազմամարդ էին: Հայաստանի տարբեր կազմակերպությունների ներկայացուցիչներ, ուսանողներ, դպրոցականներ, քաղաքացիներ, սփյուռքահայեր և օտարերկացիներ այսօր՝ ապրիլի 22-ին, վաղ առավոտից գալիս էին Ծիծեռնակաբերդում ծաղիկներ դնելու և հարգելու Ցեղասպանության զոհերի հիշատակը:
Երևան ժամանած լիբանանահայ Աստղիկ Սարաֆյանը NEWS.am-ի հետ զրույցում նշեց, որ այստեղ է՝ Ապրիլի 24-ին եւս մեկ անգամ Հայոց ցեղասպանության զոհերի հուշահամալիր այցելելու և Ցեղասպանության զոհերի հիշատակն հարգելու համար.
«Երևան եմ այցելել 4 օրով, որպեսզի Ապրիլի 24-ին կարողանամ ծաղիկ դնել Ցեղասպանության զոհերի հուշահամալիրում»,-նշեց նա:
Կանադահայ Արմեն Կյուրխչյանը, որը նույնպես Ապրիլի 24-ին Ծիծեռնակաբերդ այցելելու և Ցեղասպանության զոհերի հիշատակը հարգելու համար է Երևան ժամանել, մեզ հետ զրույցում կարևորեց Հայոց ցեղասպանության միջազգային ճանաչումն ու դատապարտումը.
«Այն պահից, երբ աշխարհի երկրները ճանաչեն Հայոց ցեղասպանությունը, Թուրքիան կունենա և նյութական, և տարածքային կորուստներ, որը կարևոր է մեզ համար: Ես հուսով եմ, որ մի օր կգա այդ օրը և մենք բոլորս կհասնենք արդարության»,-նշեց նա:
Լիբանանահայ Սեդա Խաչատուրյանը, Հայաստանում է երկրորդ անգամ, մեզ հետ զրույցում նա նշեց, որ ամեն ինչ արել է, որպեսզի կարողանա ներկա գտնվել Հայոց ցեղասպանության 100-ամյա տարելիցին.
«Այժմ իմ հայրենիքում եմ և ոգեկոչում եմ Ցեղասպանության զոհերի հիշատակը: Կարևոր է, որ աշխարհի հայերը այս օրերին գան Հայաստան և այդպիսով աշխարհին ավելի լսելի դարձնեն Ցեղասպանության միջազգային ճանաչման հարցը»,-ասաց Աստղիկը:
