նախընտրելի դարձնելԻնտերնետային «SOS» հաղորդման հաղորդավար Վիլեն Գայֆեջյանը հրապարակային ներողություն չի խնդրի ոստիկանությանից եւ 1-ական միլիոն դրամ փոխհատուցում չի վճարի ոստիկանության երկու ծառայողներին, որոնց կարծիքով` հաղորդման ընթացքում արատավորել է իրենց պատիվը, արժանապատվությունը եւ նսեմացվել ՀՀ ոստիկանության բարի համբավը: Այս մասին այսօր՝ հուլիսի 28-ին, Երեւան քաղաքի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում լրագրողների հետ զրույցում ասաց Վիլեն Գայֆեջյանը իր դեմ ոստիկանության ներկայացրած հայցի քննության գործով դատական նիստի ավարտից հետո (ֆոտոռեպորտաժ):
«Չեմ պատրաստվում հրապարակավ ներողություն խնդրել, որովհետեւ ես ոչ մեկին չեմ վիրավորել, ոչ մի անձնական վիրավորանք ոչ մեկին չեմ հասցրել, դրա համար պետք է ծանոթանանք իրենց ներկայացրած ապացույցներին: Մեզ համար հասկանալի չէ, թե ինչից է վիրավորվել ոստիկանությունը»,- ասաց Վիլեն Գայֆեջյանը:
Նշենք, որ հայցով պահանջվում է քաղաքացիա-իրավական պատասխանատվության ենթարկել հաղորդավարին` հրապարակային ներողություն խնդրել Ոստիկանությունից եւ Ոստիկանության աշխատակիցներ Արթուր Մադաթյանից, Սերգեյ Զաքարյանից, նաեւ վճարել նրանց փոխհատուցում` նվազագույն աշխատավարձի 1000–ապատակի չափով, «SOS» հաղորդման 11-րդ թողարկման ընթացքում ոստիկաններին «շան տղերք» անվանելու համար: Նշենք, որ համացանցում մեծ լսարան ունեցող հաղորդման ժամանակ այս արտահայտությունն օգտագործվել է` անդրադառնալով մայիսի 13-ին, նախագահական նստավայրի դարպասների մոտ բանակում մահացած զինվորների սեւազգեստ մայրերին փողոցով քարշ տալու միջադեպին:
Հաղորդավարը նաեւ անդրադարձավ իր իրավապաշտպան Արտակ Զեյնալյանին բացարկ հայտնելու դատավորի որոշմանը եւ ասաց, որ իրենք չեն համակերպվելու այդ որոշման հետ, պատրաստվում են համապատասխան քայլեր ձեռնարկե , որպեսզի նա կարողանա որպես պաշտպան հանդես գալ:
Վիլեն Գայֆեջյանի փաստաբան Հայկուհի Հարությունյանը միջնորդեց հետաձգել դատական նիստը եւ ողջամիտ ժամանակ տրամադրել ոստիկանության ներկայացրած հայցին ծանոթանալու համար, հաջորդ դատական նիստը նշանակվեց սեպտեմբերի 4-ին:
«SOS» հաղորդման հաղորդավար Վիլեն Գայֆեջյանին սատարելու էին եկել մի քանի տասնյակ համակիրներ, որոնց թվում` Գյումրիի «Ասպարեզ» լրագրողական ակումբի նախագահ Լևոն Բարսեղյանը և «Ո՛չ թալանին» նախաձեռնության անդամները:
Դատարան եկած բազմաթիվ լրագրողներին եւ հաղորդավարին սատարողներին չհաջողվեց ներս մտել դահլիճ: Դատական կարգադրիչները բացատրում էին, որ դահլիճում այլևս նստելու տեղ չկա, իսկ կանգնել չի թույլատրվում: Որպես բողոքի նշան նրանք նստեցին դահլիճի դռան դիմաց:
Ընդմիջման ժամանակ դատական դահլիճ մտած Լեւոն Բարսեղյանը հրաժարվեց ենթարկվել դատական կարգադրիչների պահանջին եւ դուրս գալ նիստերի դահլիճից՝ պահանջելով տրամադրել մեծ նիստերի դահլիճ:
«Ես բացատրում եմ, որ սա հանրային մեծ նշանակությամբ վեճ է. Սահմանադրությամբ չնախատեսված մի մարմին, որի անունն է ոստիկանություն, որն անգամ իրավաբանական անձ չէ, դատի է տվել ֆիզիկական անձի: Կարծում եմ, որ պետք է պատշաճ պայմաններ ապահովվեն գործի քննության համար»,- NEWS.am-ի հետ զրույցում ասաց Լեւոն Բարսեղյանը:
Դատական կարգադրիչները, սակայն, ասում էին, որ ազատ մեծ դահլիճ չկա, այնտեղ քննվում են քրեական գործեր:
Նշենք, որ դատավոր Արթուր Սմբատյանը չթույլատրեց տեսանկարահանել դատական նիստը, թույլատրեց միայն ձայնագրել նիստը եւ լուսատեսանկարահանել նիստի առաջին հինգ րոպեները։
