նախընտրելի դարձնելԱնցյալ տարեվերջին սկսված թանկացումները շարունակվում են նաեւ այս օրերին: Հունվարի 1-ից հանրապետությունում թանկացել են բենզինը, դիզելային վառելիքն ու բնական հեղուկ գազը: Սա պայմանավորված է Հարկային նոր օրենսգրքով, որը համաձայնեցվել է ԵՏՄ կանոնակարգին. այսօր պարզաբանում է տարածել Տնտեսական մրցակցության պաշտպանության պետական հանձնաժողովը:
«Սպառողների խորհրդատվության կենտրոն»-ի նախագահ Կարեն Չիլինգարյանը վստահ է, սակայն, որ սա միայն սկիզբն է, դեռ 40 անուն ապրանք էլ թանկանալու է: Սպառողական ապրանքների թանկացումները բողոքի ալիք են բարձրացրել: NEWS.am-ի հետ զրույցում քաղաքացիները դժգոհել են, որ ստիպված հրաժարվել են որոշ մթերքներից՝ նախապատվությունը տալով դեղերին:Թոշակառուների սուղ բյուջեն նույնիսկ կենսական անհրաժեշտության դեղերին չի բավականացնում։
Հունվարի 19-ին թանկացումների դեմ Երեւանում բողոքի երթ է անելու «Ելք» դաշինքը: Նշենք, որ հանրապետության նախագահն այսօր հանդիպել է ֆինանսների նախարարի հետ եւ հորդորել ձեռնպահ մնալ հարկային օրենսդրությունը հաճախակի խորքային փոփոխությունների ենթարկելուց:
Արցախում ականապայթյունային վիրավորում է ստացել 2 զինծառայող: Նրանք վիրավորվել են մարտական դիրքում հունվարի 4-ին: Երկուսն էլ Ստեփանակերտից տեղափոխվել են Երեւան, նրանց վիճակը կայուն ծանր է գնահատվում: Հիշեցնենք, որ հունվարի 7-ին էլ հակառակորդի կրակոցից զոհվել էր մեկ ժամկետային զինծառայող, եւս երկուսը թեթեւ վնասվածքներ էին ստացել:
Երեւանում 2 ոստիկանի մահվան ելքով վթարի գործով նախօրեին ձերբակալվել է «Ճվճվ Արոյի» որդին՝ «Սաքուլիկ» մականունով հայտնի Սարգիս Վարդանյանը: Ողբերգական վթարը տեղի էր ունեցել Աբովյան-Սայաթ-Նովա խաչմերուկում. Վարդանյանը «BMW X6»-ով բախվել էր ճանապարհային ոստիկանության մեքենայի, ինչի հետեւանքով ոստիկաններից մեկը տեղում էր մահացել, մյուսը՝ հիվանդանոցում:
Քննչական կոմիտեն պարզել է, որ «Ճվճվ Արոյի» որդին եղել է առանց վարորդական իրավունքի, մեքենայում եւս 2 անձ է եղել: Ի դեպ, «Սաքուլիկն» ու եղբայրն առաջին անգամ չէ, որ հայտնվում են նման սկանդալային պատմության կենտրոնում, սակայն միշտ, այսպես ասած, «ջրից չոր են դուրս գալիս»: Հատկանշական է, որ երեկվա վթարից հետո իրավապահները հանկարծ «հիշեցին», որ «Սաքուլիկի» եղբայրը՝ Սերժ Վարդանյանը, նույնպես մեղադրյալի կարգավիճակ ունի, հետախուզում հայտարարվեց, իսկ այսօր արդեն նա բերման ենթարկվեց ոստիկանություն եւ կալանավորվեց:
Շուրջ 20 ընտանիք տուրիստական ընկերության խաբեության զոհն է դարձել, եւ Ամանորը ստիպված դիմավորել է «Զվարթնոց» օդանավակայանում: Ընտանիքները «Պրոգրեսսիվ թրավելի» միջոցով պետք է Եգիպտոս մեկնեին, սակայն օդանավակայանում պարզվել է, որ իրենց կեղծ փաստաթղթեր են տվել: Տուրիստներն արդեն դիմել են իրավապահներին: Դատարան է պատրաստվում դիմել նաեւ տուրիստական ընկերության տնօրենը: Նա պնդում է, որ ինքն է խաբեության զոհ դարձել:
Ռուսաստանում Ամանորի գիշերը 2 հայ տղամարդ այլոց ծեծկռտուքի պատահական զոհ են դարձել։ Կրասնոդարում գործող սրճարաններից մեկում կնոջ պատճառով առաջացած վիճաբանության ժամանակ մի տղամարդ կրակ է բացել ներկաների ուղղությամբ: Հրաձգության հետեւանքով ազգությամբ հայեր՝ սրճարանի դիջեյն ու այցելուն տեղում մահացել են: Հարուցվել է քրեական գործ, ձերբակալված կա:
Տոնական օրերին Երեւանի շտապօգնության ծառայությունը 6.582 կանչ է ստացել՝ 466-ով ավելի, քան անցյալ տարի: Լրագրողների հետ հանդիպմանը «Շտապօգնության» ղեկավար Թագուհի Ստեփանյանը նշել է, որ այս տարվա առաջին օրերին կանչերի հիմնական պատճառը սիրտ-անոթային հիվանդություններն էին, բարձր ջերմությամբ ուղեկցվող մրսածությունը, վնասվածքները: Եղել է թունավորման 8 դեպք, որից 4-ը՝ ալկոհոլային խմիչքների չարաշահման պատճառով:
Հունվարի 9-ին եվրոն էժանացել է շուրջ 3 դրամով: Դոլարի փոխարժեքը կազմել է 484 դրամ, եվրոյինը՝ 578, ռուբլունը՝ 8 դրամ 49 լումա, ֆունտինը՝ 656 դրամ:
Հանրապետության տարածքում հունվարի 10-ին սպասվում է առանց տեղումների եղանակ: Օդի ջերմաստիճանը որոշ շրջաններում կնվազի 4-5 աստիճանով: Երեւանում նույնպես տեղումներ չեն սպասվում: Մայրաքաղաքում գիշերը կդիտվի -2-4 աստիճան ցուրտ, ցերեկը՝ +7+9 աստիճան տաքություն:
