ՆախընտրելիԶեյթունի ոստիկանները հայտնաբարել են մեքենաներից գողություն արած երիտասարդներին։ Այս մասին այսօր՝ ապրիլի 14–ին, NEWS.am-ը տեղեկանում է ոստիկանության լրատվական ծառայությունից։
Ոստիկանության Քանաքեռ-Զեյթունի բաժնում տեղեկություններ են ստացվել, որ Քանաքեռի 6-րդ փողոցի բնակիչ 17 և 19-ամյա երկու երիտասարդ վարչական տարածքում գողություններ են անում: Տեղեկությունների իսկությունը ստուգելուց հետո իրավապահներն ապրիլի 12-ին Հասրաթյան փողոցից երկուսին էլ բերման են ենթարկել ոստիկանության Քանաքեռ-Զեյթունի բաժին:
Պարզվել է, որ նրանք ապրիլի 11-ին, ժամը 23.30-ի սահմաններում, Հասրաթյան փողոցում կայանված «ԶԱԶ» մակնիշի մեքենայի սրահից գողացել են լապտեր ու խոհանոցային պարագաներ: Բայց սա ամենը չէր: Մոտ մեկ ամիս առաջ կոտրել են «Հաղթանակ» զբոսայգում կայանված «Լեքսուս» և «Տոյոտա» մակնիշի երկու մեքենաների պատուհանները, գողացել պայուսակներ, որոնցից մեկի մեջ` 60.000, իսկ մյուսում 50.000 դրամ էր եղել: Գողոնը մասամբ հայտնաբերվել է: Փաստի առթիվ նախապատրաստվում են նյութեր:
