նախընտրելի դարձնել«Լուսավոր Հայաստանը» պատրաստել է ճանապարհային քարտեզ կարճ ժամանակահատվածի համար, թե ինչպես կարող ենք երկիրը հանել այս իրավիճակից: Այս մասին, այսօր՝ նոյեմբերի 14-ին, ֆեյսբուքյան ուղիղ եթերում նշեց «Լուսավոր Հայաստան» խմբակցության ղեկավար Էդմոն Մարուքյանը:
Նա նախ ներկայացրել է, թե ինչ վիճակու ունենք այսօր. «44 օր հայ ազգը, բոլոր քաղաքական ուժերը, հասարակական սեկտորի ներկայացուցիչները մտավորականությունը, մեդիան, Սփյուռքը, Արցախը, բոլորով միախմբված վարել ենք պատերազմ: Պատերազմը եղել է սարսափելի:
Ստորագրվել է փաստաթուղթ, որը, ըստ էության, կապիտուլյացիայի ակտ է: Այն հայտարարություն է հրադադարի մասին, որով նաեւ որոշվում է, թե ինչպես է ավարտվում պատերազմը, ով որտեղ է կանգնում, ում ինչ է մնում, եւ ռուսական խաղաղապահ ուժ-երն այս օրերին արդեն տեղակայվում են:
Բացի հումանիտար աղետը, հազարավոր վիրավորները, զոհերի, փախստականները, նաեւ իրավիճակը երկրում լարվում է, որովհետեւ քաղաքական պրոցեսներ չկան: Մենք այդ գիշեր փորձեցինք խորհրդարանի նիստ գումարել, դա չեղավ, ԱԺ-ն չաշխատեց այդ գիշեր, որից հետո տարբեր քաղաքական ուժերի միջեւ տարբեր կոնսուլտացիաներ են եղել, բայց ոչ մի ուժ չի ներկայացրել ճանապարհային քարտեզ, թե ինչ է պետք անել: Փաշինյանը պետք է հեռանա, բայց հետո ի՞նչ պետք է լինի: Սկսվել է քարոզչություն, որ եթե Փաշինյանը հեռանա, երկրում կլինի քաոս: Ես ուզում եմ տեղեկացնել, որ հիմա քաոս է երկրում:
Շատ վատ փաստաթուղթ է ստորագրվել: Կարո՞ղ էր լինել ավելի վատ, այո, կարող էր: Այս պահին իրվիճակը կարող է հանգուցալուծել միայն իշխանությունը: Դրա համար պետք է պարտության սիմվոլը հեռանա, որովհետեւ եթե չհեռանա անհնար է լինելու երկու կողմերի միջեւ եղած ատելությունը որեւէ ձեւի կառավարել: Լինելու են բախումներ»,-հայտարարեց Մարուքյանը:
Նա ներկայացրել է իրավիճակից դուրս գալու՝ «Լուսավոր Հայաստանի» կազմած գործողությունների ծրագիրը.
«I. Պարտության սիմվոլ վարչապետը հեռանում է։
Խորհրդարանն ընտրում է ժամանակավոր վարչապետ։
Ձևավորվում է իրենց ոլորտներում հաջողության հասած մարդկանց անցումային կառավարություն:
II. Հայ-ռուսական հարաբերությունների բարձր որակի ապահովում
III. Հայաստանի, Ադրբեջանի և Ռուսաստանի միջև ստորագրված հայտարարության անորոշ դրույթների շուրջ բանակցությունների նախաձեռնում և վարում՝ հայանպաստ լուծումների հասնելու նպատակով: Արցախի ինքնորոշման իրավունքի վերջնական ամրագրման և կենսագործման, երկարաժամկետ կայունության և խաղաղության, հայկական շահը արտահայտող, հավասարակշռված համաձայնագիր ունենալու նպատակով՝ Մինսկի խմբի համանախագահների ձևաչափով բանակցությունների ընթացքի վերականգնում։
IV. Հայաստան-Արցախ-Սփյուռք ներուժի համախմբում
V. Ներքին իրավիճակի կայունացում, բախումների դադարեցում, հանրային համերաշխության վերականգնում, պառակտող գործողությունների, բռնության կոչերի, ատելության խոսքի բացառում։
VI. Պետական ինստիտուտների վերականգնում, ամրապնդում: Իրավապահ մարմինների աշխատանքի խիստ համակարգում, երկրում կարգուկանոնի ամրապնդում՝ հանրային անվտանգության վերականգնման ապահովման նպատակով։
VII. Զոհված և վիրավորված զինծառայողների ու նրանց ընտանիքների կարիքների պատշաճ ապահովում։
VIII. Արցախահայության (այդ թվում՝ փախստականների) սոցիալական կարիքների անհապաղ լուծում և կենսագործունեության պայմանների վերականգնում Արցախում։
IX. Կորոնավիրուսի դեմ պայքարի արդյունավետ համակարգում։
X. Միջազգային դոնորների համաժողովի հրավիրում՝ ԱՄՆ, Չինաստան, Ռուսաստան, ԵՄ 27 երկրներ, Իրան, արաբական երկրներ և այլն: Հայաստան-Արցախ ավիրված հատվածի վերականգնման համար առնվազն 1 մլրդ դոլար միջոցների ներգրավում:
XI. Հայկական դիվանագիտության թիմի աշխատանքների հիմնարար փոփոխություն, արտաքին քաղաքականության վերաիմաստավորում, նախաձեռնողական քաղաքականության վարում դաշնակից և այլ պետությունների հետ: Հայաստանի խախտված իրավունքների պաշտպանության նախաձեռնում միջազգային դատական ատյաններում:
XII. Տնտեսությունն ու բանակը վերականգնելու ազգային հեռանկարային ծրագրի մշակում, կայուն զարգացման ապահովում:
XIII. Ազատ, արդար ու թափանցիկ, հավասար պայմանների ապահովմամբ՝ խորհրդարանական ընտրությունների անցկացում»:
