ՆախընտրելիՀՀ երկրորդ նախագահ Ռոբերտ Քոչարյանը քվեարկության էր եկել կնոջ՝ Բելլա Քոչարյանի հետ: Նա քվեարկում էր 7/3 ընտրական տեղամասում, որը գտնվում է Բաբաջանյան-139 հասցեում գտնվող 78 մանկապարտեզի շենքում:
Քվեարկությունից հետո նա պատասխանեց լրագրողների հարցերին:
Հարցին, թե ինչպե՞ս է գնահատում ձեր շանսերը, նա պատասխանեց. «Կասկածո՞ւմ եք»:
Քոչարյանը հայտարարեց, որ քվեարկել է հանուն արժանապատիվ խաղաղության եւ տնտեսական վերելքի:
Անդրադառնալով ՀՀ նախկին վարչապետ Կարեն Կարապետյանի հետ համագործակությանը՝ ՀՀ երկրորդ նախագահն ասաց. «Ակնհայտ է, որ Կարեն Կարապետյանը մեզ հետ է: Հետագայում ինչ կարգի համագործակցություն կլինի, դեռ չենք խոսում: Եկեք դա չքննարկենք»:
Հարցին, թե ինչպե՞ս էգնահատում իրենց ցուցակում ընդգրկված Արմեն Չարչյանի մասնակցությամբ ձայնագրությանը, որտեղ նա ուղղորդում էր իր աշխատողներին մասնակցել ընտրություններւն ու քվեարկել «Հայաստան» դաշինքի օգտին, Քոչարյանը պատասխանեց. «Ընդհանրապես աբսուրդի ժանրից էր նրա ձերբակալումը: Չեմ կարծում, որ այստեղ որեւէ հիմքեր կային ձերբակալության: Ինքն իր կարծիքն է ասել, եւ այդ տեսանկյունից չեմ կարծում, որ որեւէ ճնշման արտահայտություն է»:
Երկրորդ նախագահը անդրադարձավ նաեւ նրան, որ լռության օրը Նիկոլ Փաշինյանը հանդես եկավ ուղերձով՝ կոչ անելով մասնակցել ընտրություններին. «Բարեբախտաբար ԿԸՀ-ն արձագանքեց այդ խախտմանը: Կարծում եմ՝ սա ցույց է տալիս այս իշխանության դեմքը, որ որեւէ հարգանք չունեն օրենքի նկատմամբ, չեն ունեցել այս 3 տարվա ընթացքում եւ շարունակում են չունենալ նույնիսկ ընտրության օրը»,-ասաց նա:
Հարցին, թե հետընտրական ի՞նչ զարգացումներ է ինքը կանխատեսում, Քոչարյանը խորհուրդ տվեց իրադարձություններից առաջ չընկնել. «Ընտրություններից հետո կերեւա»:
