նախընտրելի դարձնելԿառավարությունն իր այսօրվա՝ ապրիլի 15-ի նիստում որոշեց այս տարվա մայիսի 21-31-ը Երևանում անցկացվելիք բռնցքամարտի մեծահասակների Եվրոպայի առաջնությունը կազմակերպելու և անցկացնելու նպատակով «Ֆակտորի Փրոդաքշն» ՍՊԸ-ին ՀՀ կառավարության պահուստային ֆոնդից հատկացնել 750.192.000 դրամ գումար:
Ժամանակի սղության պատճառով առաջնության նախապատրաստման և անցկացման համար մնացած սեղմ ժամանակահատվածում միջոցառումը ժամանակին կազմակերպելու և չձախողելու համար, նաև հիմք ընդունելով միջոցառման վրա տարվող աշխատանքների ծավալը՝ անհրաժեշտություն է առաջացել գումարը տրամադրել ուղիղ դրամաշնորհի տեսքով, որը հնարավորություն կտա ժամանակին կազմակերպել և իրականացնել միջոցառումը:
ԿԳՄՍ նախարար Վահրամ Դումանյանը նշեց, որ այդ գումարը կուղղվի բրենդավորման եւ այլ ծախսերի իրականացման, գովազդային, տպգրական եւ սոցիալական ցանցերում առաջխաղացման, բացման հանդիսավոր արարողության եւ մրցաշարի ընթացքում միջոցառումների կազմակերպման ծառայությունների ձեռբերմանը:
Նրա խոսքով, առաջնության ընթացքում ակնկալվում է շուրջ 280 մարզիկների մասնակցություն, ինչպես նաև նրանց ուղեկցող անձնակազմի և այլ պատվիրակների մասնակցություն: Ընդհանուր առմամբ ակնկալվում է շուրջ 400 անձանց մասնակցություն:
Առաջնության անցկացումը իր կարևոր տեղն ունի մարզաձևի զարգացման և մասսայականացման գործում, ինչի արդյունքում Հայաստանի Հանրապետությունն էլ ավելի ճանաչելի կդառնա միջազգային մարզական հարթակներում՝ որպես առաջատար երկիր:
Միևնույն ժամանակ այն կնպաստի մշակույթային արժեքների և տուրիզմի զարգացմանը՝ այդ թվում հյուրանոցային, մշակութաին կենտրոնների և մարզական կառույցների վերականգմանը՝ իր հերթին հետք թողնելով տնտեսությանը համընթաց զարգացմանը:
Վահրամ Դումանյանը հավելեց, որ այս առաջնություն իր ծավալով ու նշանակությամբ աննախադեպ է, նույնիսկ խորհրդային տարիներին Հայաստանում նման մակարդակի սպորտային միջոցառում չի կազմակերպվել:
ԲՎարչապետ Նիկոլ Փաշինյանն իր հերթին նշեց, որ թեեւ սա իրականացվում է մեկ անձից գնում ընթացակարգով, բայց իրականացվել է գնային հարցում 6 ընկերությունների, նրանցից երեքը դիմել են իրենց առաջարկներով եւ հանձնաժողովի քննարկման արդյունքում ընտրվել է այս ընկերությունը:
Նշենք, որ մրցաշարը տեղի է ունենալու Մարզահամերգային համալիրում:
