նախընտրելի դարձնելՀրազդան քաղաքում այսօր՝ հուլիսի 30-ին, տեղի է ունեցել 2022 թվականի երիտասարդական մայրաքաղաք հռչակվելու բացման արարողությունը:
Միջոցառմանը ներկա են եղել ԿԳՄՍ փոխնախարար Արթուր Մարտիրոսյանը, Հրազդանի համայնքապետ Սեւակ Միքայելյանը, 44-օրյա պատերազմի մի շարք մասնակիցներ, Արցախից տեղահանվածներ եւ պատերազմում զոհված զինծառայողների հարազատներ: Ներկաները ծաղիկներ են խոնարհել հերոսների հիշատակը հավերժացնող հուշահամալիրի մոտ:
ԿԳՄՍ փոխնախարարը NEWS.am-ի հետ զրույցում ասել է, որ ծրագրի հիմնական նպատակն այն է, որ Հայաստանի բոլոր քաղաքների երիտասարդներն ապրեն մշակութային կյանքով:
«Սա մի գործիք է, որով փորձում ենք քաղաքին մայրաքաղաքային շունչ հաղորդել: Նպատակն է աջակցել մարզային երիտասարդական կյանքի ակտիվացմանը, երիտասարդների կարողությունների բացահայտմանը եւ համակողմանի զարգացմանը: Տվյալ քաղաքը ճանաչվում է մշակութային մրցութային կարգով»,- ասել է նա:
Հրազդանի դրամատիկական թատոնում տեղի է ունեցել նաեւ բացման հանդիսավոր միջոցառումը, որի ընթացքում ԿԳՄՍ փոխնախարարի եւ Հրազդանի համայնքապետի միջեւ ստորագրվել է հուշագիր, որից հետո Հրազդանին պաշտոնապես հանձնվել է երիտասարդական մայրաքաղաքի բանալին:
