ՆախընտրելիՔաղաքացիները իրազեկման ակցիա են իրականացնում Գյումրիում՝ ի աջակցություն տավուշցիների: Այս մասին հայտնում է «Տավուշը հանուն հայրենիքի նախաձեռնությունը»:
Ավելի վաղ հայտնել էինք, որ նախաձեռնությունը քաղաքացիներին կոչ է արել հանրապետության տարբեր հատվածներում շարունակել անհնազանդության ակցիաները՝ ի աջակցություն Տավուշի սահմանամերձ գյուղերի բնակիչների:
«Մարդիկ կարող են մտածել, որ սպառնալիք չկա և ասեն՝ թո՛ղ Տավուշի գյուղերը հանձնեն ու մենք կունենանք խաղաղություն: Դա մոլորություն և ինքնախաբեություն կլինի: Առանց որևէ անվտանգային երաշխիքի տարածքային զիջումները հանգեցնելու են պետականության կորստի: Մենք ՀՀ քաղաքացիներին կոչ ենք անում չլռել, պայքարել, դիմադրել, մերժել: Նիկոլը խաբում է, թե իբր Հայաստանը դաշնակիցներ չունի, բայց ոչ թե Հայաստանն է մենակ, այլ Նիկոլը, դրանք տարբեր բաներ են»,-ասաց «Մայր Հայաստան» դաշինքի առաջնորդ Անդրանիկ Թևանյանը:
«Հայաստանի անվտանգային խնդիրների մեծ մասը ներսից են գալիս, իշխանության վարած քաղաքականությունը Հայաստանի անվտանգության թիվ մեկ սպառնալիքն է»,-հավելեց նա:
Հիշեցնենք, որ վաղ առավոտյան ժամը 6-ի սահմաններում ոստիկանության մեծ ուժեր են ժամանել Կիրանց գյուղ, որտեղից բիրտ ուժ կիրառելով բերման են ենթարկել ճանապարհը փակած բնակիչներին, այդ թվում անչափահասների: Ականատեսները պատմում են, որ մարդկանց ծեծելով են բերման ենթարկել: Ոստիկանության բաժանմունքի մոտ է նաեւ Բագրատ Սրբազանը:
ՆԳՆ-ն հաղորդագրություն է տարածել՝ նշելով, որ ՊՆ-ն ականազերծման աշխատանքներ է իրականացնում Կիրանց-Խեյրիմլի հատվածում, դրա համար ճանապարհները փակվել են: Թույլ չեն տալիս գյուղ մտնել նաեւ լրագրողներին:
Գյուղապետ Կամո Շահինյանի խոսքով, նրանք հերթապահություն էին իրականացնում, որպեսզի թույլ չտան ականազերծման աշխատանքներ իրականացնել:
