նախընտրելի դարձնելՌուսաստանի Նովգորոդ քաղաքի հայտնի Զնամենսկի տաճարի հարևանությամբ գտնվող Կինոյի թանգարանը Ռուսաստանում միակ մասնավոր թանգարանն է, որը ներկայացնում է կինոյի պատմությունը՝ ստեղծումից մինչև թվայնացում: NEWS.am-ի թղթակցի հետ զրույցում թանգարանի հիմնադիր Վալերի Ռուբցովը պատմում է՝ թանգարանի ստեղծման գաղափարը առաջացել է դեռևս 2012 թվականին, երբ ինքը հասկացել է, որ ժամանակակից կինոյի ֆոնին ֆիլմարտադրության հին տեխնիկան աստիճանաբար մոռացվում է:
Թանգարանի հիմնադիր Վալերի Ռուբցովն ինքն էլ երիտասարդ տարիքում զբաղվել է սիրողական ֆիլմարտադրությամբ. թանգարանում ցուցադրված հավաքածուի հիմքը հենց իր ունեցած ցուցանմուշներն են եղել: Տարիներ շարունակ խնամքով հավաքած ցուցանմուշները Վալերի Ռուբցովը հնարավորություն է ունեցել մեկ հարկի տակ ներկայացնել միայն 2018 թվականին: Այսօր թանգարանում մոտ 4000 ցուցանմուշ կա:
Տեսախցիկներ, սիրելի դերասանների լուսանկարներով ու ստորագրություններով պաստառներ, ֆիլմերի օրիգինալ սցենարներ, նվագարկիչներ, խորհրդային ֆիլմերում օգտագործված հագուստներ, հայտնի մուլտֆիլմեր, համր ֆիլմերի ցուցադրություն. սովետական ֆիլմերի սիրահարների մոտ այս վայրը մանկության ու պատանեկության ջերմ հուշեր է արթնացնում:
Կինոյի թանգարանի առաջին հարկում ցուցադրված է «Կինեմատոգրաֆ. Սկիզբը» հավաքածուն, որտեղ ներկայացած է, թե ինչպես է ծնվել կինոն և ովքեր են եղել դրա ակունքներում: Թանգարանի երկրորդ հարկում էլ ներկայացված են ֆիլմարտադրության բոլոր մասնագիտությունները. սցենարիստ, ռեժիսոր, դերասան, օպերատոր, դիմահարդար, բեմադրիչ նկարող, հագուստի դիզայներ:
Վալերի Ռուբցովը Կինոյի թանգարանի այցելուներին է ներկայացնում խորհրդային դերասաններ Իրինա Ալֆորովային և Ալեքսանդր Աբդուլովին նվիրված հանդերձարանը, որտեղ ներկայացված են դերասանների ստորագրություններով պաստառներ, նրանց մասնակցությամբ ֆիլմեր, թատերական ազդագրեր:
Թանգարանում իրականացվող էքսկուրսիաների ժամանակ նա այցելուներին ցուցադրում է նաև, թե ինչպես էին սովետական ֆիլմերում ձայնագրում քայլերի, քամու, կրակի ձայները, ձիերի ոտնաձայները, թռչնի թեւերի թափահարման ձայները:
Երեկոյան ժամերին թանգարանում նաև կենդանի երաժշտության ներքո համր ֆիլմեր են ցուցադրում: Թանգարանի մուտքի տոմս գնած այցելուն հնարավորություն է ստանում նաև մասնակցել համր ֆիլմերի ցուցադրությանը, կազմակերպվող քննարկումներին ու դասընթացներին:
