ՆախընտրելիՌուսաստանը կշարունակի համակողմանի աջակցություն ցուցաբերել իր ադրբեջանցի և հայ գործընկերներին ամենաբարձր մակարդակով եռակողմ համաձայնագրերի հիման վրա տարածաշրջանում կայուն խաղաղության և բարգավաճման հաստատման գործում։ Այդ մասին ամենշաբաթյա ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
Նա ընդգծել է, որ այդ պայմանավորվածությունների կարևորությունը անհնար է գերագնահատել: Ռուսաստանը և անձամբ նախագահ Վլադիմիր Պուտինը մեծ աշխատանք են կատարել համաձայնությունների հասնելու համար, որոնք թույլ են տվել դադարեցնել արյունահեղությունը։
Զախարովան հիշեցրել է, որ 2021 թվականի հունվարին Մոսկվայում տեղի է ունեցել գագաթնաժողով՝ Հայաստանի և Ադրբեջանի ղեկավարների մասնակցությամբ։ Այս գագաթնաժողովում մեկնարկել է խաղաղության գործընթացը, որի շրջանակներում երեք երկրների փոխվարչապետների ղեկավարությամբ ստեղծվել է եռակողմ աշխատանքային խումբ։
Նա նշել է, որ նոյեմբերի 9-ի համաձայնագրի հիման վրա կառուցվել է եռակողմ համաձայնագրերի մի ամբողջ համակարգ, ներառյալ այնպիսի ոլորտներ, ինչպիսիք են խաղաղության պայմանագրի մշակումը, տրանսպորտային շրջափակումների վերացումը, սահմանների սահմանազատումն ու սահմանագծումը, ինչպես նաև զարգացումը եւ շփումները երկրների քաղաքացիական համայնքների միջև:
«Այս շրջանակի շնորհիվ մենք կարողացել ենք իրական, բովանդակալից արդյունքների հասնել տարբեր հարցերի շուրջ: Հայաստանը, Ադրբեջանը և Ռուսաստանը մոտ էին տարածաշրջանում տրանսպորտային ուղիների վերականգնմանը 2023 թվականի հունիսին, սակայն Արևմուտքի ճնշման ներքո Երևանը դադարեցրեց մասնակցությունը աշխատանքային խմբերին և բոլոր եռակողմ ձևաչափերին»,- նշել է Զախարովան։
Նրա խոսքով՝ ԱՄՆ-ն և ԵՄ-ն, հանդես գալով որպես միջնորդ, ոչ մի նոր բան չեն առաջարկել և միայն վերարտադրել են ռուսական զարգացումները՝ խեղաթյուրելով դրանց էությունը։ Զախարովան հավելել է, որ իրականում Արևմուտքը ձգտում է վերահսկել խաղաղ գործընթացը, որպեսզի մեծացնի իր ազդեցությունը տարածաշրջանում և դուրս մղի Ռուսաստանին, Իրանին և Թուրքիային։
«Նրանց համար նշանակություն չունի Հարավային Կովկասի ժողովուրդների ճակատագիրը, նրանք առաջնորդվում են միայն իրենց ամբիցիաներով. Ի տարբերություն Արևմուտքի, մենք անկեղծորեն շահագրգռված ենք Հարավային Կովկասի անվտանգությամբ, կայունությամբ և բարգավաճմամբ։ Այս տարածաշրջանը մեր պատմական, տնտեսական և հումանիտար շահերի գոտին է։ Մենք պատրաստ ենք նպաստել դրա զարգացմանը, քանի որ դա կայունության և անվտանգության հիմքն է»,- ընդգծել է Զախարովան։
